Ռուսական «Արկտիկա» տիեզերական համակարգի գործարկումը հետաձգվել է պատժամիջոցների պատճառով

ԵՐԵՎԱՆ, 2 նոյեմբերի- Sputnik. Հետաձգվել է«Արկտիկա» տիեզերական համակարգի գործարկումը, որը պետք է հետևի եղանակի փոփոխություններին և օգնի արկտիկական տարածաշրջանում օգտակար հանածոների հետախուզությանը։ Պատճառն ամերիկյան  պատժամիջոցներն են, որոնց համաձայն արգելվում են բաղադրիչներ առաքել ռուսական արբանյակների համար, երկուշաբթի գրում է «Իզվեստիա» թերթը:

Այդ մասին թերթին պատմել է Սերգեյ Լեմեշևսկին՝ «Լավոչկինի անվան ՊՈԱԿ»-ի գլխավոր տնօրենը։ Հենց այս կազմակերպությունն է 2012թ.-ին շահել «Արկտիկայի» ստեղծման պայմանագիրը:

««Արկտիկայի» ժամկետը հետաձգել ենք, քանի որ պետք է վերափոխվեր սարքի մի մասը»,- պատմել է նա:

Նշվում է, որ «Արկտիկա» տիեզերական սարքերը, ինչպես և այլ ռուսական արբանյակները պետք է կազմված լինեն արտասահմանյան բաղադրիչներից: Դրա հետ կապված՝ Լեմեշևսկու խոսքով տիեզերական սարքերն արդիականացվում են, օրինակ` «Արկտիկան» պետք է միանա «Էլեկտրո» համակարգին:

«Այժմ մենք տեսնում ենք, որ առաջին «Էլեկտրո Լ» սարքն աշխատում է, բայց որոշ փոփոխություններ պետք է արվեն։ Ուստի մենք զգալիորեն արդիականացրել ենք «Էլեկտրո Լ» թիվ 2-ը: Մենք որոշել ենք նաև արդիականացնել «Արկտիկան»՝ «Էլեկտրո Լ» առաջին սարքի մոտ առաջացած խնդիրները բացառելու համար: Բայց տարբերությունն այն է, որ «Էլեկտրո Լ» երկու սարքերը պատրաստել ենք արտասահմանյան տարրերի բազայի օգտագործմամբ: Չինական էլեկտրոնային-բաղադրիչային բազան մենք դեռ չենք օգտագործում, ուստի հաշվի ենք առնում հիմնականում ռուսական էլեկտրոնային արդյունաբերությունը»,- բացատրում է ՊՈԱԿ-ի ղեկավարը:

Թերթը հիշեցնում է, որ 2012թ.-ին Ռոսկոսմոսը ՊՈԱԿ-ի հետ պայմանագիր է կնքել «Արկտիկա» բազմաթիրախ տիեզերական համակարգի առաջին շարքի պատրաստման համար, որը կապ և մշտական դիտում է ապահովում բևեռային շրջաններում և Հյուսիսային սառուցյալ օվկիանոսի ջրային տարածությունում: Ըստ պայմանագրի աշխատանքների կատարման սկզբնական ժամկետը 2015թ.-ի նոյեմբերն է: Մինչև այդ ամսաթիվն արբանյակն արդեն պետք է լինի ուղեծրում: