Ամերիկացի քարոզիչը հորդորում է աղոթել Պուտինի համար

ԵՐԵՎԱՆ, 28 հոկտեմբերի – Sputnik. «Ես կոչ եմ անում աղոթել Ռուսաստանի նախագահի համար, քանի որ նա պաշտպանում է ավանդական քրիստոնեությունը», – պատրիարք Կիրիլի հետ հանդիպման ժամանակ ասել է «Բիլլի Գրեմի ավետարանական առաքելության» ղեկավար Ֆրանկլին Գրեմը։

«Երբ ես դեռ երիտասարդ էի, մենք անհանգստանում էինք, որ աշխարհն անհավատ կդառնա կոմունիզմի ազդեցության հետևանքով, սակայն կոմունիզմը վերացավ, իսկ անհավատությունը մնաց։ Ցավոք, իմ նախագահը նույնպես (Բարաք Օբամա – խմբ.) անհավատություն է քարոզում», – պատմել է քարոզիչը։

Նա դժգոհությամբ է խոսել այն մասին, որ ԱՄՆ–ի Գերագույն խորհուրդը բոլոր նահանգների իշխանություններին միասեռ ամուսնությունների գրանցումը պարտադրելու մասին որոշում է ընդունել։ Նա չի թաքցրել դժգոհությունը նաև Օբամայի վարած քաղաքականության կապակցությամբ` նշելով, որ նա «քարոզում է Աստծուն չհավատալ»։ «Համասեռամոլությունը մեղք է, իսկ Ամերիկայում նույնիսկ եկեղեցիներն են այժմ պայքարում դրա համար», – ընդգծում է Գրեմը։  «Ես այդ մասին ասել եմ նախագահ Օբամային, սակայն նա չհասկացավ։ Ցավոք, նա քրիստոնեական մտածողություն չունի», – ավելացրել է քարոզիչը։

Պատրիարք Կիրիլի հետ զրույցի ժամանակ առաքելության ղեկավարը խոսել է նաև Մերձավոր Արևելքում քրիստոնյաների հետապնդումների մասին։ «Նախագահ Ասադը պաշտպանում էր Սիրիայի քրիստոնյաներին, եթե նա պարտվի, բոլոր քրիստոնյաներին կվերացնեն», – համոզված ասել է Գրեմը։