Ամերիկյան նրբերշիկների ու հոթ–դոգերի մեջ մարդու ԴՆԹ կա

ԵՐԵՎԱՆ, 28 հոկտեմբերի – Sputnik. ԱՄՆ–ում արտադրված նրբերշիկների ու հոթ–դոգերի 2%–ում մարդու ԴՆԹ կա, վստահեցնում են ամերիկյան Clear Food Labs կենտրոնի գիտնականները։

Ինչպես նշում են փորձագետները, հայտնաբերված դեպքերի երկու երրորդը բաժին է ընկնում բուսակերների համար նախատեսված նրբերշիկներին։ Գիտնականները սննդամթերքում մարդու ԴՆԹ–ի առկայությունը կապում են արտադրման ընթացքում սանիտարական նորմերը խախտելու հետ։

Բացի այդ, գիտնականները կարծում են, որ որոշ արտադրողներ պիտակի վրա իրենց արտադրանքի սննդային արժեքների վերաբերյալ սխալ տեղեկություն են նշում` չափազանցնելով սննդամթերքում սպիտակուցի պարունակության ցուցանիշները։

Կենտրոնի տվյալների համաձայն, մի շարք փորձանմուշներում այնպիսի բաղադրիչներ են եղել, որոնք պետք է բաղադրատոմսում չլինեին։ Խոսքը հավի նրբերշիկի մեջ խոզի մսի պարունակության մասին է։  Գիտնականները նաև հայտնաբերել են, որ բուսակերների համար նախատեսված նրբերշիկների 10%–ում միս կա։

Գիտնականներն ուսումնասիրել են 75 տարբեր ապրանքանիշների 345 նմուշ, որոնց թվում եղել են և՛ ավանդական նրբերշիկներ, և՛ բուսակերների համար նախատեսված նրբերշիկներ։