ԵՐԵՎԱՆ, 28 հոկտեմբերի– Sputnik. Էկոլոգիան և էներգիայի նոր տեսակները դարձել են չորեքշաբթի Տոկիոյում բացված Tokyo Motor Show 2015 44–րդ ավտոսալոնի գլխավոր նորաձև ուղղությունները։
Toyota ավտոկոնցեռնն առաջին անգամ ցուցադրել է ջրածնով աշխատող FCV Plus կոնցեպտուալ մեքենան, որն ընդունակ է «կիսել» չօգտագործված էլեկտրականությունը։
«Կարճ ասած` դա մարտկոց է կամ էլեկտրակայան` անիվների վրա։ FCV Plus ավտոմեքենան ընդունակ է մշակել ավելորդ էներգիան և այն «հանձնել» բնակելի տան սպասարկմանը կամ «կիսել» էլեկտրականությունը շրջանի էլեկտրահամակարգի հետ»,– ավտոմեքենայի առավելություններն է բացատրել ընկերության ներկայացուցիչը։ Այն բանից հետո, երբ մեքենան սպառում է օգտագործման ժամկետը որպես ավտոմեքենա, այն կարող է ծառայել որպես տնային գեներատոր։
2014թ.–ին Toyota–ն սկսել է աշխարհում առաջին Mirai ավտոմեքենայի վաճառքը, որն աշխատում է ջրածնով։ Ավտոկոնցեռնը ներկայացնում է Mirai–ն` որպես ապագայի ավտոմեքենա («միրաի» ճապոներեն նշանակում է «ապագա»)։ Դրա գլխավոր առանձնահատկությունը ջրածնային շարժիչն է, որն աշխատում է էներգիայի հաշվին, որն արտադրվում է ջրածնի և թթվածնի միավորման դեպքում։ Մինչև վաճառքի մեկնարկը շատերը կասկածել են, որ դրա պահանջարկը կայուն կլինի ամենից առաջ գնի պատճառով` շուրջ 70 հազար դոլար։ Սակայն հոռետեսները զարմացել են առաջին արդյունքներիից. Toyota–ն նախատեսել է մեկ տարում վաճառել 400 նման ավտոմեքենա, սակայն աշնանը պատվերների թիվը գերազանցել է 3 հազարը։
2016թ.–ին ջրածնային ավտոմեքենաների ոլորտում մրցակցությունն ավելի լարված կդառնա. Honda ավտոկոնցեռնը կսկսի իր մեքենայի վաճառքը, որն աշխատում է ջրածնով։ Գնով այն շատ չի տարբերվի Mirai–ից, բայց կգերազանցի վազքով. երեք րոպե լիցքավորումը բավարար կլինի 700 կիլոմետրի համար։
Mitsubishi ավտոկոնցեռնը ներկայացրել է Mitsubishi eX concept էլեկտրակոնցեպտուալ մեքենան, հզոր էլեկտրամարտկոցների հաշվին մեկ լիցքավորումը բավական կլինի 400 կմ համար։ Isuzu ընկերությունը ներկայացրել է աշխարհում առաջին ավտոբուսը, որն աշխատում է բիովառելիքով` կիրառելով կանաչ ջրիմուռներ և արդեն մեկ տարի ուղևորներ է տեղափոխում ճապոնական Ֆուձիսավա քաղաքում։
