ԵՐԵՎԱՆ, 13 հոկտեմբերի – Sputnik. «Տրանսաերո» ավիաընկերության չվերթերը դադարեցնելու մասին հրամանը կարող է ստորագրվել հոկտեմբերի 15-ից հետո, չվերթերը կարող են դադարեցվել արդեն հաջորդ շաբաթվանից, գրում է «Կոմերսանտ» թերթը` հղում անելով աղբյուրին։
Ինչպես հայտնում է թերթը` Ռուսավիացիան նախօրեին ավարտել է «Տրանսաերո» ընկերության ֆինանսատնտեսական վիճակի արտահերթ ստուգումները, որի համար հիմք էր հանդիսացել, այդ թվում, «թռիչքների անվտանգության վիճակի վատթարացումը» և ավիաընկերության ֆինանսական ցուցանիշները, ինչպես նաև «անվճարունակության հետ կապված դատավարությունը»։
Հրատարակության տվյալների համաձայն` ստուգումները ցույց են տվել, որ «Տրանսաերոյի» հիմնական արտադրական ցուցանիշների վատթարացման պատճառով իսկապես կարող է խնդիր առաջանալ անվտանգության և սպառողների իրավունքների պահպանման հետ կապված։ Հաղորդվում է, որ Ռուսավիացիայում միայն ասել են, որ «Տրանսաերոյի» համալիր եզրակացությունը «դեռ պատրաստ չէ», իսկ տեղեկությունը «սերտիֆիկատի դադարեցնելու մասին չի համապատասխանում իրականությանը»։
Թերթի տվյալների համաձայն` «Տրանսաերոյի» հետագա գործունեության հետ կապված իրավիճակը քննարկվել է Մինտրանսի խորհրդակցության ժամանակ, այնտեղ որոշել են ընկերության ճակատագրի հետ կապված վերջնական որոշման ձևակերպումը տալ մեկ շաբաթից։
«Տրանսաերո» խոշորագույն մասնավոր ռուսական ավիաընկերությունը չի կարող սպասարկել լիզինգային պարտավորությունների հետ միասին մոտ 250 միլիարդ ռուբլի կազմող պարտքերը: Պետական «Աերոֆլոտին» «Տրանսաերոյի» բաժնետոմսերի 75 տոկոսը փոխանցելու` կառավարության հավանությանն արժանացած առողջացման ծրագիրը տապալվեց: Վարկատուները դիտարկում են ավիաընկերության սնանկացման միակ տարբերակը:
