Շեքսպիրյան «Գլոբուս» թատրոնը Երևանում «Համլետ» կխաղա

ԵՐԵՎԱՆ, 8 հոկտեմբերի– Sputnik. Անվանի բրիտանական «Գլոբուս» թատրոնը հինգշաբթի հայ հանդիսատեսի համար կխաղա «Համլետ» ներկայացումը Վիլյամ Շեքսպիրի համանուն պիեսի հիման վրա` HighFest-2015 միջազգային թատերական 13–րդ փառատոնի շրջանակում։

«Գլոբուս» թատրոնը հիմնվել է 1599թ.–ին մի խումբ դերասանների  միջոցներով, որոնց շարքում եղել է նաև անձամբ հանճարեղ դրամատուրգը։ Հենց այստեղ են առաջին անգամ բեմադրվել Շեքսպիրի շատ ստեղծագործություններ։

Ինչպես հաղորդեց  մամուլի ասուլիսում դերասանուհի Ֆոբե Ֆիլդեսը, HighFest-2015–ում թատերախմբի մասնակցությունը շատ կարևոր է, քանի որ դերասանները հնարավորություն են ստացել դրսևորել իրենց թատերական բազմազանության միջավայրում` աշխարհի շատ թատրոնների կողքին։

«Մեզ նախօրեին բախտ է վիճակվել դիտել «Ես այստեղ եմ» ներկայացումը, որը մեզ հսկայական բավականություն է պատճառել։ Մենք տպավորվել ենք դերասանների խաղով, թեև մենք ոչինչ չենք հասկացել, քանի որ ներկայացումը ռուսերեն լեզվով էր»,– նշեց նա։

Իր հերթին դերասան Լադի Էմիրուվան նշեց, որ «Գլոբուսի» դերասանները փորձում են պահպանել շեքսպիրյան ավանդույթները, շեքսպիրյան տեքստը, թեև չի բացառվում որոշակի ժամանակակից տարրերի կիրառումը։

Հատկանշական է, որ տարբեր ներկայացումներում Համլետի դերը հերթով խաղում են տարբեր դերասաններ։ Նրանցից շատերը խաղում են միանգանից մի քանի դեր, ընդ որում, կանայք կարող են հանդես գալ տղամարդկանց դերում և հակառակը։

«Գլոբուս» թատրոնը մասնակցում է երևանյան թատերական փառատոնին հյուրախաղերի շրջանակում, որոնք մեկնարկել են 2014թ.–ի ապրիլի 26–ին` Վիլյամ Շեքսպիրի 450–ամյակի առթիվ։ Հյուրախաղերը կավարտվեն 2013թ.–ի ապրիլի 23–ին` անգլիացի դրամատուրգի մահվան 400–ամյակի օրվա կապակցությամբ։

Հյուրախաղերի ընթացքում «Համլետ» ներկայացումը խաղացել են ավելի քան 120 անգամ աշխարհի ամենատարբեր թատերական հարթակներում` ԱՄՆ–ում, Եվրոպայի, Ասիայի, Աֆրիկայի երկրներում։ Այն հասցրել է դիտել շուրջ 100 հազար մարդ։

HIGHFEST թատերական փառատոնը մեկնարկում է հոկտեմբերի 1–ին «ՆՓԱԿ» նորարար փորձառական արվեստի կենտրոնում և կտևի մինչև հոկտեմբերի 8–ը։

Առաջին անգամ HAY FEST–ն անցկացվել է 2003թ.–ին։ Փառատոնի նպատակն է ներկայացնել հայ հանդիսատեսին համաշխարհային թատերական մշակույթը, նպաստել Հայաստանում թատերական արվեստի զարգացմանը և ներկայացնել այն միջազգային մակարդակում։

Sputnik Արմենիա պորտալը փառատոնի տեղեկատվական հովանավորն է։