Պատգամավոր. Ֆրանկոֆոնիայի կազմակերպության համաժողովը կբարձրացնի Հայաստանի դերն աշխարհում

ԵՐԵՎԱՆ, 8 հոկտեմբերի – Sputnik. Ֆրանկոֆոնիայի կազմակերպության միջազգային նախարարական համաժողովի անցկացումը Երևանում կբարձրացնի Հայաստանի դերն աշխարհում, ասաց Ֆրանկոֆոնիայի խորհրդարանական վեհաժողովում Հայաստանի Ազգային ժողովի պատվիրակության ղեկավար Մարգարիտա Եսայանը։

Ֆրանկոֆոնիայի կազմակերպության միջազգային նախարարական համաժողովի 31–րդ նստաշրջանը կկայանա Երևանում հոկտեմբերի 10-11–ը։

«Հոկտեմբերի 9–ին Հայաստան կժամանի մոտ 500 ներկայացուցիչ 80 երկրից, անկախ Հայաստանի պատմության մեջ այսպիսի համաժողով չի եղել։ Դրանում մեծ դեր է խաղացել մեր արտաքին գործերի նախարարության աշխատանքը»,– ասաց Եսայանը։

Ըստ նրա` հատկապես կարևոր է, որ նման միջոցառումն անցկացվելու է Հայոց ցեղասպանության 100–րդ տարելիցի տարում։

«Համաժողովի շրջանակում այստեղ կլինեն նաև Իսլամական համագործակցության կազմակերպության, Չմիանալու շարժման ներկայացուցիչներ։ Ինքը` ՖՄԿ–ն, արդեն ընդունել է Արցախի երկու հայամետ դիմումներ, ինչը մեզ համար մեծ հաղթանակ է»,– ասել է Եսայանը։

Նա նշեց, որ Հայաստանի մասին ոչ միայն բարեկամ, այլ նաև մյուս երկրների պատկերացումները կարևոր են, քանի որ կարող են նպաստել աշխարհում Հայաստանի դերի բարձրացմանը։

Միջոցառմանը մասնակցելու համար պաշտոնական այցով Երևան կժամանի ՖՄԿ գլխավոր քարտուղար Միքայել Ժանը։

Նիստի ընթացքում կքննարկվեն ՖՄԿ օրակարգի հարցեր, այդ թվում` արդիական տարածաշրջանային և միջազգային խնդիրներ, որոնց շուրջ կընդունվեն համապատասխան բանաձևեր։

Նախատեսվում է մշակութային հարուստ ծրագիր, որի շրջանակում Երևանում և Գյումրիում ելույթ կունենան երաժշտական կոլեկտիվներ Ֆրանսիայից և Հաիթիից։ Գլխավոր մշակութային իրադարձություն կդառնա հայազգի շանսոնիե Շառլ Ազնավուրի համերգը հոկտեմբերի 10–ին Կ.Դեմիրճյանի անվան ՄՀՀ–ում։ Նաև ծրագրված է զբոսաշրջության, բարձր տեխնոլոգիաների, արտադրության այլ ոլորտների, ինչպես նաև հայկական մշակույթը ներկայացնող ցուցահանդեսների անցկացում։