ԵՐԵՎԱՆ, 29 սեպտեմբերի–Sputnik. Բացի նախօրեին արդեն հայտարարված զոհերից, ադրբեջանական բանակը սեպտեմբերի 28-ին ունեցել է ևս 6 կորուստ, հայտնում է ԼՂՀ պաշտպանության նախարարության մամուլի ծառայությունը։
Ինչպես նշվում է հաղոորդագրության մեջ, երեկ` սեպտեմբերի 28-ին, Ադրբեջանի պաշտպանության նախարարության կողմից տարածված տեղեկությունն առ այն, թե իբր ղարաբաղա-ադրբեջանական հակամարտ զորքերի շփման գծում տեղի ունեցած հերթական առճակատման հետևանքով ադրբեջանական կողմը տվել է 3, իսկ հայկական կողմը` 7 կորուստ, չի համապատասխանում իրականությանը։
«Պաշտոնական Բաքուն փորձել է սեփական կորուստների իրական թիվը վերագրել ղարաբաղյան կողմին», – նշվում է հաղորդագրության մեջ։
Ինչպես հայտնի է դարձել պաշտպանության բանակի համապատասխան ծառայությունների կողմից ձեռք բերված տվյալներից, բացի արդեն նախօրեին հայտարարված զոհերից, ադրբեջանական բանակը սեպտեմբերի 28-ին ունեցել է ևս 6 կորուստ` Շահիյար Ալի օղլու Ույադով, Էյուբ Աբդուլլա օղլու Ռամազանով, Նիջաթ Մեհման օղլու Յարաև, Ահմեդ Ջիվանշիր օղլու Էյուբով, Էլվին Մուշրու օղլու Յուսուֆով և Սամիր Սաբիր օղլու Ահմեդով։
«Կատարվածը ցույց է տալիս, որ Ադրբեջանի պաշտպանական գերատեսչությունը շարունակում է թաքցնել իր իրական կորուստները` սեփական հանրությանը մոլորության մեջ պահելու և ընտրած հանցավոր մարտավարության անհաջողությունները քողարկելու նպատակով», – հայտնում է ԼՂՀ պաշտպանության նախարարությունը։
Չնայած վերոնշված կորուստների փաստին` հակառակորդը սեպտեմբերի 28-ին և լույս 29-ի գիշերը շարունակել է ինտենսիվորեն խախտել հրադադարի պահպանման ռեժիմը
«Հայկական դիրքերի ուղղությամբ հակառակորդը կիրառել է նաև TR-107 տիպի ռեակտիվ հրթիռահրետանային կայանք (11արկ)», – նշվում է հաղորդագրության մեջ։
ԼՂՀ պաշտպանության նախարարությունը հայտնում է, որ ՊԲ առաջապահ զորամասերը վստահորեն իրականացնում են իրենց առջև դրված մարտական խնդիրը և անհրաժեշտության դեպքում դիմում պատժիչ գործողությունների:
