ԵՐԵՎԱՆ, 28 սեպտեմբերի – Sputnik. Art Raccord ցուցահանդեսը լուսանկարչության լավագույն ավանդույթները վերականգնելու նպատակ ունի, ասաց Raccord Group–ի միջազգային կապերի գլխավոր տնօրենի տեղակալ Ինգա Միրզոյանը։
Սեպտեմբերի 28–ին Երևանում մեկնարկել է Art Raccord միջազգային երկրորդ ցուցահանդեսը, որը կտևի մինչև հոկտեմբերի 5–ը։
«Ցուցահանդեսում ներկայացվել է տարբեր երկրների 33 հեղինակների` տարբեր ժանրերում կատարած ավելի քան 100 աշխատանք, բայց դրանց միավորում է այն, որ բոլորը նկարահանված են ժապավենի վրա։ Ցուցահանդեսում ներկայացվել են նաև իրենց տեսակի մեջ եզակի աշխատանքներ»,– ասաց Միրզոյանը։
Raccord Armenia–ի ներկայացուցիչ Կարեն Քոչարյանը նշեց, որ Հայաստանը հարուստ է իր լուսանկարչական ավանդույթներով, մեր երկրում մեծ թվով տաղանդավոր լուսանկարիչներ են աշխատում։ Հենց այդ պատճառով ցուցահանդեսն այդքան պահանջված է, և ենթադրվում է, որ այն կնպաստի Հայաստանում լուսանկարչության` որպես արվեստի ուղղության զարգացմանը։
Ըստ նրա, հետագայում նույնպես ծրագրվում է նմանատիպ ցուցահանդեսներ անցկացնել, որոնց կմասնակցեն նաև հայ լուսանկարիչները։ Art Raccord ցուցահանդեսում ներկայացված են հայ տաղանդավոր լուսանկարիչ Կարեն Քարտաշյանի աշխատանքները։
Լուսանկարիչ Վահան Քոչարը նշեց, որ դժվար է գերագնահատել բարի, հին լուսանկարի նշանակությունը, երբ լուսանկարիչը վերահսկում էր ողջ գործընթացը սկզբից մինչև վերջ։ Պատահական չէ, որ Art Raccord ցուցահանդեսին ներկայացրած աշխատանքներում գերակշռում է հենց գեղարվեստական տարրը։
Ցուցահանդեսի կազմակերպիչները երախտագիտություն հայտնեցին Sputnik Արմենիա միջազգային տեղեկատվական պորտալին ցուցահանդեսին աջակցելու համար։
Դե ինչ, լուսանկարչական տոնը մեկնարկել է։ Հայաստանի մշակութային կյանքում այն մեծ իրադարձություն է դարձել։ Հուսանք` Հայաստանի լուսանկարչական հին ու բարի ավանդույթների հետևորդները երկրորդ շունչը կառնեն, և հայ լուսանկարչության գնահատողները դեռ բազմաթիվ այսպիսի վառ իրադարձությունների ականատեսը կդառնան։
Ցուցահանդեսը կազմակերպել է Raccord Group ընկերությունը` Հայաստանի նկարիչների միության և Raccord Armenia ընկերության աջակցությամբ։
Art Raccord ցուցահանդեսը լուսանկարչության լավագույն ավանդույթները վերականգնելու նպատակ ունի
22:02 28.09.2015 (Թարմացված է: 17:46 12.10.2015)
© Sputnik / Асатур Есаянц
Բաժանորդագրվել
Art Raccord ցուցահանդեսը լուսանկարչության լավագույն ավանդույթները վերականգնելու նպատակ ունիՑուցահանդեսում ներկայացվել է տարբեր երկրների 33 հեղինակների` տարբեր ժանրերում կատարած ավելի քան 100 աշխատանք, բայց դրանց միավորում է այն, որ բոլորը նկարահանված են ժապավենի վրա, ասել է Raccord Group–ի միջազգային կապերի գլխավոր տնօրենի տեղակալ Ինգա Միրզոյանը։
