Պուտինը խոսում է վետոյի մասին

ԵՐԵՎԱՆ, 28 սեպտեմբերի – Sputnik. ՄԱԿ–ի անվտանգության խորհրդում մշտապես կիրառվել է վետոյի իրավունքը, և կազմակերպության հիմնադրման ժամանակ չէր էլ ենթադրվում, որ այդ հարցում համախոհություն կտիրի, ՄԱԿ–ի գլխավոր վեհաժողովում ունեցած ելույթի ժամանակ ասաց ՌԴ նախագահ Վլադիմիր Պուտինը։

«Միավորված ազգերի կազմակերպությունը կառույց է, որն իր հավասարը չունի լեգիտիմության, ներկայացուցչական ու ունիվերսալ լինելու առումով։ Այո, ՄԱԿ–ի հասցեին վերջին շրջանում բավականաչափ քննադատություն է հնչում, իբր այն ոչ բավարար արդյունավետություն է ցուցադրում, իսկ սկզբունքային որոշումների ընդունումը հակասություններ է առաջացնում, նախևառաջ, Անվտանգության խորհրդի անդամների միջև։ Սակայն պետք է նշեմ, որ ՄԱԿ–ի գոյության 70 տարիների ընթացքում հակասություններ միշտ են եղել, վետոյի իրավունքը կիրառվել է մշտապես։ Դրանից օգտվել են ԱՄՆ–ն, Մեծ Բրիտանիան, Ֆրանսիան, Չինաստանը, Խորհրդային միությունը, ավելի ուշ` Ռուսաստանը։ Լրիվ բնական է այդքան ներկայացուցչական կազմակերպության համար»,– ասաց Պուտինը։

Նա ավելացրեց, որ ՄԱԿ–ի կազմավորման ժամանակ հնարավոր չէր ենթադրել, որ այստեղ համախոհություն կտիրի։ «Փոխզիջումներ փնտրելն ու մշակելը կազմակերպության էությունն է, իսկ նրա ուժը տարբեր կարծիքներ ու տեսակետներ հաշվի առնելու մեջ է»,– ավելացրեց նախագահը։