Գիտնականների հայտնաբերած խխունջն այնքան փոքր է, որ հեշտությամբ կանցնի ասեղի անցքի միջով

ԵՐԵՎԱՆ, 28 սեպտեմբերի – Sputnik. Գիտնականները Չինաստանի հարավում գտնվող Գուանսի գավառի տարածքում խխունջների մի քանի անսովոր տեսակ են հայտնաբերել, որոնք այնքան փոքր են, որ հեշտությամբ կանցնեն ասեղի անցքով։ Այս մասին գրված է ZooKeys ամսագրում հրապարակված հոդվածում։

«Արտասովոր խխունջները ոչ միայն շարժել են մարդկանց հետաքրքրությունը, այլև մտորումների առիթ դարձել` ինչպես են նրանք կարողանում հարմարվել շրջակա միջավայրին։ Այս փոքրիկ խխունջների ուսումնասիրությունը չափազանց կարևոր է մոլորակի կենսաբազմազանությունը գնահատելու համար, հասկանալու համար, թե ինչպես է զարգանում գաճաճությունը անողնաշարավորների շրջանում»,– ասել է Նագաոյի Սինսյու համալսարանի գիտնական Բարնա Փոլ Հերգելին։

Գիտնականները հայտնաբերել են միանգամից յոթ տեսակի խխունջներ, որոնք առանձնանում են աննկարագրելի փոքր չափերով։ Խխունջի խեցու ամենահաստ հատվածի երկարությունն ու բարձրությունը չի գերազանցում մեկ միլիմետրը և կազմում է 0,86 – 0,91մմ։ Բոլոր խխունջները դասվել են Angustopila շարքը, ինչը լատիներեն նշանակում է «նեղ շարասյուն»։

Գիտնականները ենթադրում են, որ Չինաստանի և այլ արևադարձային երկրների տարածքներում կարող են նույնքան փոքր օրգանիզմներ ապրել, որոնց հայտնաբերելը չափազանց դժվար է, քանի որ նման փոքր չափեր ունեցող կենդանիների որոնման մեխանիզմներ չկան։ Խխունջներին հայտնաբերած գիտնականների թիմը, սակայն, համոզված է, որ իրենք առաջիկա տարիներին կկարողանան նոր բացահայտումներ անել։