Հայ փորձագետ. ի տարբերություն Ղարաբաղի, տանկերը Կատալոնիա չեն մտնում

ԵՐԵՎԱՆ, 28 սեպտեմբերի– Sputnik. «Ինտեգրացիա և զարգացում» հետազոտական–վերլուծական հասարակական կազմակերպության նախագահ Արամ Սաֆարյանը Կատալոնիայում ազատ կամարտահայտության հնարավորությունը կապում է քաղաքացիներին տրամադրվող ազատության աստիճանի հետ։

Նախորդ կիրակի Կատալոնիայում տեղի ունեցած ընտրությունների ժամանակ Junts pel Si կոալիցիան, քվեաթերթիկների մոտ 99 տոկոսի հաշվարկի արդյունքում, ստացել է 62 տեղ ինքնավար շրջանի խորհրդարանում։ «Ժողովրդական միասնության թեկնածության» տասը մանդատների հետ միասին դա ինքնավարության առանձնացման կողմնակիցներին ապահովում է 72 մանդատ, այսինքն` բացարձակ մեծամասնություն։ Սակայն ընտրություններին այս երկու քաղաքական ուժերի օգտին քվեարկել է ընտրողների 47,8 տոկոսը, այսինքն` կեսից պակասը։

«Շոտլանդիայում, Կատալոնիայում կարող է հանրաքվե կազմակերպվել, և դրանից հետո տանկեր չեն մտցվի, քվեարկություն կազմակերպած մարդկանց ոչնչացնելու փորձեր չեն ձեռնարկվի ։ Ինչու՞ այդ շրջաններում կարելի է խոսել այն մասին, որ ես անկախության կողմնակից եմ, հանգիստ ապրել և աշխատել, իսկ երբ Լեռնային Ղարաբաղի բնակիչները ցանկություն են հայտնում ազատ ապրել, նրանց պետք է պարտադիր մեկուսացնել և ճնշել` կիրառելով բռնություն», – հարցադրում է անում Սաֆրաստյանը։

Նրա խոսքով` այս ամենի պատճառն այն վատ շրջապատն է, որտեղ գտնվում է հայկական պետությունը։

«Մենք ապրում ենք սարսափելի շրջապատում, այդ պատճառով պետք է լինենք շատ ուշադիր, զգոն, կազմակերպված`արտաքին ազդեցությանն ու մարտահրավերներին հակազդելու համար», – կարծում է Սաֆարյանը։

«Նորավանք» գիտակրթական հիմնադրամի գործադիր տնօրեն Գագիկ Հարությունյանն իր հերթին նշեց, որ քաղաքացիների կամարտահայտության պայմաններում առկա տարբերությունը կախված է նաև աշխարհաքաղաքական բաղկացուցչից։

«Մենք տեսնում ենք, թե ինչպես է դա քաղաքակիրթ ձևով տեղի ունենում Շոտլանդիայում, Կատալոնիայում, իսկ Դոնեցկում և Լուգանսկում ծանր հրետանու կիրառելով` հարվածներ են հասցնում քաղաքին։ Ինքներս շատ լավ գիտենք, թե ինչ է դա, քանի որ նույն բանը տեսել ենք Ստեփանակերտում», – ասաց Հարությունյանը։

Նրա խոսքով` հայերը, ի տարբերություն ուրիշների, նվաճել են անկախությունն ու հաղթել սեփական հողում։