Բլատերին մի քանի օրից կհեռացնեն ՖԻՖԱ–ից, եթե նա ինքնակամ չհեռանա

ԵՐԵՎԱՆ, 28 սեպտեմբերի– Sputnik.  Ֆուտբոլի միջազգային ֆեդերացիայի (ՖԻՖԱ) նախագահ Յոզեֆ Բլատերը մի քանի օրվա ընթացքում կզրկվի պարտականությունների կատարման լիազորություններից, եթե ինքնակամ չհեռանա պաշտոնից, հաղորդում է Ֆրանս Փրես գործակալությունը` հղում անելով գերմանական ԶԼՄ–ներին։

Ուրբաթ Շվեյցարիայի արդարադատության դաշնային բյուրոն գործ է հարուցել Բլատերի նկատմամբ։ Շաբաթ օրը Guardian հրատարականությունը տեղեկացրել էր, որ ՖԻՖԱ–ի էթիկայի հարցերով կոմիտեն ևս  քննություն է սկսել Բլատերի նկատմամբ։

«Եթե Բլատերն ինքնակամ չհեռանա պաշտոնից, ապա նրան կհեռացնեն մի քանի օրվա ընթացքում», – նշվում է հաղորդագրության մեջ։

ՖԻՖԱ–ի նախագահը կասկածվում է այն բանում, որ ապօրինի կերպով երկու միլիոն շվեյցարական ֆրանկ է փոխանցել Պլատինիին, ով իր հերթին բացատրել է, թե վճարն իրականացվել է պայմանագրով։ ԶԼՄ–ների տվյալներով` ՖԻՖԱ–ի կոմիտեն Պլատինիի նկատմամբ ևս քննություն է սկսել։

Ավելի վաղ Ռուսաստանի ֆուտբոլի միության պատվավոր նախագահ Վյաչեսլավ Կոլոսկովը «Р-Спорт» գործակալությանը տեղեկացրել էր, որ Բլատերին կարող է հեռացնել միայն ՖԻՖԱ–ի կոմիտեն։

Բլատերը, ով գլխավորում է ՖԻՖԱ–ն 1998 թ.–ից, մայիսի 29–ին վերընտրվել էր 5–րդ անգամ` հաղթելով իր միակ մրցակցին` Հորդանանի արքայազն Ալի բին Ալ–Հուսեյնին, սակայն արդեն հունիսի 2–ին հայտարարեց, որ հեռանում է իր պաշտոնից։