ԵՐԵՎԱՆ, 21 սեպտեմբերի – Sputnik. Google-ը կայքի հայկական տարբերակում դուդլ է տեղադրել` նվիրված Հայաստանի Անկախության օրվան, որը նշվում է երկրում սեպտեմբերի 21-ին:
Դուդլը տեղադրվել է կիրակի գիշերը և օրվա ընթացքում google.am-ի բոլոր օգտատերերը կարող են տեսնել կայքում Հայաստանը խորհրդանշող Արարատ լեռը, առջևում ծածանվող եռագույնով:Google-ը պարբերաբար փոխում է իր լոգոն այսպես կոչված դուդլներով (անգլ. doodle «խզբզել, անփութորեն նկարել»): Սովորաբար Google-ը տարբերանշանը փոխում է տոնական օրերին, հայտնի մարդկանց ծննդյան տոներին և խոշոր իրադարձությունների ժամանակ:
Դուդլը պատկեր է, անիմացիա և Google-ի լոգոտիպի հիման վրա արված խաղեր, որոնք հայտնվում են որոնողական համակարգի գլխավոր էջին տարբեր իրադարձությունների, տոների և հոբելյանների առիթով: Դուդլի կոնցեպցիան ստեղծվել է 1998 թվականին:
2000 թվականին Լարին և Սերգեյը խնդրեցին վեբ-վարպետ Դենիս Խվանին, ով այն ժամանակ դեռ պրակտիկա էր անցնում ընկերությունում, դուդլ նկարել Բաստիլիայի գրավման օրվա կապակցությամբ: Նկարն այնքան էր դուր եկել օգտատերերին, որ Դենիսը նշանակվեց դուդլի պատասխանատու, որը ավելի հաճախ սկսեց հայտնվել Google-ի գլխավոր էջում: Ի սկզբանե դուդլ ստեղծում էին միայն մեծ տոներին ընդառաջ: Այսօր կորպորացիան դուդլեր է հրապարակում տարբեր առիթներով:
Ժամանակի ընթացքում դուդլերը մեծ համբավ ձեռք բերեցին և հանրամատչելի դարձան ամբողջ աշխարհում: Ներկա պահին դուդլերի ստեղծմամբ զբաղվում է տաղանդավոր նկարիչների և ինժեներների մի մեծ թիմ: Այսօրվա դրությամբ ստեղծվել է ավելի քան 2000 դուդլ:
Իրականում, յուրաքանչյուր ցանկացող կարող է նամակ գրել Google-ին այս կամ այն տարբերանշանը նկարելու խնդրանքով: Եվ եթե գաղափարը արժանի է իրագործման, ապա մեծ է հավանականությունը, որ այն իրականություն կդառնա: Ընդ որում դուդլերը լինում են ինչպես գլոբալ, այսինքն google-ի բոլոր դոմեններում երևացող, այնպես էլ տեղային, նախատեսված կոնկրետ պետությունների համար:
2011 թվականի մարտի 22-ին Google-ը պատենտ է ստացել իր դուդլերի համար` որպես «մեթոդ և համակարգ օգտատերերին կայք ներգրավելու համար»: 7912915 համարով ստացած պատենտը, դժգոհությունների և քննադատության ալիք բարձրացրեց ԶԼՄ-ներում: Հայտնի ձեռներեց Ֆլորիան Մյուլերը այդ պատենտն անվանել է «թրոլինգ»:
