ԵՐԵՎԱՆ, 12 սեպտեմբերի– Sputnik. Անցած գիշեր Երևանում կազմակերպվել էր հերթական հանրահավաքը, որն ուղղված էր էլեկտրաէներգիայի թանկացման որոշման դեմ։ Ազատության հրապարակում մեկնարկած ակցիան սկզբում խաղաղ բնույթ էր կրում, սակայն ավելի ուշ անսպասելի թափ հավաքեց։
Վերջին մի քանի ամիսների ընթացքում մի քանի տարբեր կազմակերպություններ փորձում էին կրկին բորբոքել ժողովրդական վրդովմունքի ալիքը, բայց, չգիտես ինչու, հենց «Ո՛չ թալանին» նախաձեռնող խմբի ակտիվիստները կարողացան կրկին Ազատության հրապարակ բերել իրենց համախոհներին։ Տարբեր տարիքի մարդիկ հավաքվեցին հրապարակում այն հույսով, որ համատեղ ջանքերով կարելի է հասնել ժողովրդի պահանջների կատարմանը։
«Էլեկտրական տիտանների» արթնացումը. #ElectricYerevan–ի վերադարձը
Ցուցարարների պահանջները մինչ օրս նույնն են մնում. անվավեր ճանաչել և վերանայել Հանրային ծառայությունները կարգավորող հանձնաժողովի` էլեկտրաէներգիայի սակագնի թանկացման մասին որոշումը, պատժել ոստիկաններին ցուցարարների նկատմամբ անօրինական գործողություններ իրականացնելու համար։
Դեռ ամսվա սկզբին «Ո՛չ թալանին» շարժման մասնակիցները նախազգուշացրել էին, որ կմիավորվեն, որպեսզի կրկին դժգոհություն հայտնեն այն կապակցությամբ, որ իրենց պահանջներն այդպես էլ չեն կատարվել։
Իրադարձությունները սրընթաց զարգացում ունեցան
Ուրբաթ երեկոյան Ազատության հրապարակում սկսել էին մարդիկ հավաքվել. Սկզբում նրանց թիվը մի քանի տասնյակ էր կազմում։ Երևանի ոստիկանապետի տեղակալ Վալերի Օսիպյանը հայտարարեց, որ հանրահավաքի մասնակիցների շարքում կան սադրիչներ` նախազգուշացնելով, որ ոստիկանությունը կխափանի ցուցարարների` Բաղրամյան պողոտա գնալու ցանկացած փորձ։
«Ո՛չ թալանին» խմբի անդամ Մաքսիմ Սարգսյանը պատասխանեց, որ ցուցարարների շարքում միակ սադրիչները ոստիկաններն են։
Եվ, ինչպես միշտ, սկսվեց ծեծկռտուքը։ Ինչ–որ մի պահ ցուցարարներն ու իրավապահ ուժերը բախվեցին, բայց ակտիվիստներին և նրանց համախոհներին հաջողվեց թափանցել Բաղրամյան պողոտա` կաթվածահար անելով տրանսպորտի երթևեկությունը։
Եվ կրկին նստացույց
Ոստիկանական շարասյունը շրջանցելու բոլոր փորձերը ձախողվեցին։ Ավելի ուշ ակցիայի անցկացման վայրում տեղաբաշխվեցին լրացուցիչ իրավապահ ուժերն ու ջրցան մեքենաները։
Ոստիկանությունը պահանջեց հավաքվածներին ազատել պողոտան` «խոստանալով» անհնազանդներին ենթարկել պատասխանատվության։
Ցուցարարների թիվը սկսեց աճել` տասնյակը վերածվեց հարյուրյակի։ Մարդիկ նստեցին հենց ասֆալտին` այն նույն հատվածում, որտեղ շուրջ երկու ամիս առաջ անցկացվում էր էլեկտրաէներգիայի թանկացման դեմ բողոքի շուրջօրյա ակցիան…
Խաղաղ ցուցարարներին ցրելու խաղաղ օպերացիան
Ոստիկանության մարտավարությունը, ըստ երևույթին, ճիշտ էր։ Ընդամենը պետք էր սպասել, որպեսզի հավաքվածները հոգնեն և չկարողանան ակտիվ դիմադրել։
Կեսգիշերին մոտ Հայաստանի ոստիկանությունը հայտարարություն տարածեց, որում առաջարկում էր ցուցարարներին մինչև առավոտյան ժամը 05։00–ը ինքնակամ բացել Բաղրամյան պողոտան։
Ոստիկանությունը կազմակերպիչներին և մասնակիցներին վեց ժամ տրամադրեց` իրենց պահանջներն արտահայտելու և Բաղրամյան պողոտան ինքնակամ ազատելու համար` պայմանով, որ ցույցը կշարունակի խաղաղ բնույթ կրել։
Եվ հենց այդ ժամանակ սկսվեց ցուցարարներին ցրելու «գրագետ օպերացիան»` առանց կոշտ գործողությունների, ուժ կամ հատուկ տեխնիկա կիրառելու։
Ինչպես խոստացել էին
Նշված ժամին իրավապահ ուժերը սկսեցին «մաքրել» պողոտան` նախապես հայտարարելով, որ ցուցարարներն ինքնակամ հեռանալու համար ևս կես ժամ ունեն։ Միջադեպերից խուսափելու համար ոստիկանները լրագրողներին խնդրեցին անցնել ավելի անվտանգ հատված և սկսեցին երթևեկելի մասից հեռացնել ակցիայի մասնակիցներին։
Առանց հատուկ միջոցներ և ֆիզիկական ուժ կիրառելու` ոստիկանները բռնեցին ցուցարարների ոտքերից ու ձեռքերից և հեռացրին երթևեկելի մասից։ Ողջ գործողությունը զբաղեցրեց ընդամենը մի քանի րոպե, ընդ որում շուրջ 50 ցուցարարներ բերման ենթարկվեցին ոստիկանություն։ Ավելի ուշ, մի քանի ժամ անց նրանց ազատ արձակեցին` նախապես արձանագրություն կազմելով վարչական իրավախախտումների մասին։
Հանրահավաքն ավարտված է, բայց կրքերը թեժանում են։ Ի՞նչ է լինելու
Համարձակվում ենք ենթադրել, որ «Ո՛չ թալանին» շարժման ակտիվիստները չեն հանգստանա և կփորձեն զարգացնել Հայաստանում էլեկտրաէներգիայի թանկացման դեմ բողոքի ակցիաների ալիքը։
Մնում է միայն սպասել և հուսալ, որ կգտնվի պետության և երկրի բնակիչների համար փոխզիջումային տարբերակ և իրադարձությունների լուծման այնպիսի բանաձև, որը կգոհացնի բոլորին։ Հիշեցնենք, որ առաջիկա ամիսների ընթացքում սպասվում է իշխանությունների նախաձեռնած աուդիտը` սակագների բարձրացման մասին ՀԾԿՀ–ի որոշման հիմնավորվածության մասին, որը կօգնի որոշակի պարզեցումներ մտցնել այս հարցում։
Իսկ թե ինչ գործողությունների կդիմեն ակտիվիստները, հավանաբար կիմանանք մոտ ապագայում, ինչպես միշտ` սոցիալական ցանցերի միջոցով։
