Հայաստանը Բրեստում կներկայացնի «Զրույց գիշերով» մոնոներկայացումը

ԵՐԵՎԱՆ, 11 սեպտեմբերի – Sputnik. Հայաստանը «Բելայա Վեժա» թատերական միջազգային փառատոնին կներկայացնի դերասան Ռոբերտ Հակոբյանը` «Զրույց գիշերով» մոնոներկայացումով։ Փառատոնը մեկնարկել է ուրբաթ բելառուսական Բրեստում, Sputnik Արմենիա պորտալին հայտնեց ՀՀ մշակույթի նախարարության հասարակայնության հետ կապերի բաժնի պատասխանատու Ալլա Սերոբյանը։

«Սեպտեմբերի 14-ին Բրեստում կներկայացվի «Զրույց գիշերով» մոնոներկայացումը`  Գ. Մկրտչյանի «Տախիկարդիա» պիեսի հիման վրա, որին կմասնակցի Ստանիսլավսկու անվան Ռուսական պետական դրամատիկական թատրոնի դերասան Ռոբերտ Հակոբյանը», – նշեց նա։

Սերոբյանի խոսքերով` անցյալ տարի փառատոնի հայ ներկայացուցիչը` Սունդուկյանի անվան Ազգային ակադեմիական թատրոնը, ներկայացրել էր Շեքսպիրի համանուն ողբերգության հիման վրա գրված «Ջոն արքա» ներկայացումը։

Փառատոնն իր գոյության 30 տարիների ընթացքում մեծ ճանաչում է վաստակել միջազգային փառատոնային շարժման մեջ։ Փառատոնին մասնակցել են ստեղծագործական կոլեկտիվներ ավելի քան 50 երկրներից։ Մասնակիցերկրների աշխարհագրությունը տարեցտարի ընդլայնվում է, ավելանում է նաև հյուրերի թիվը։ Այս տարի «Բելայա Վեժային» մասնակցելու համար դիմել էին տարբեր երկրներից շուրջ 100 թատրոններ։

Փառատոնին կմասնակցեն դրամատիկական, տիկնիկային, հրապարակային, երաժշտական և պլաստիկ թատրոններ 13 երկրներից` Հայաստան, Բելառուս, Բուլղարիա, Գերմանիա, Վրաստան, Իսրայել, Լատվիա, Լիտվա, Մոլդովա, Լեհաստան, Ռուսաստան, Թունիս, Ուկրաինա։

Բրեստում սեպտեմբերի 11-19-ը կներկայացվի 21 թատերական կոլեկտիվների 22 ներկայացում։ Փառատոնը կբացի Մ. Գորկու անվան ազգային ակադեմիական թատրոնի "Viva Commedia!" ներկայացումը։  Բեմադրությունները կցուցադրվեն քաղաքի վեց հարթակներում` Բրեստի ակադեմիական դրամայի թատրոնի փոքր և մեծ դահլիճներում, մարզային հասարակական–մշակութային կենտրոնում, երիտասարդական արվեստի կենտրոնում, Լենինի անվան հրապարակում և Բրեստի տիկնիկային թատրոնում։