Լևոն Արոնյանը տարել է իր առաջին հաղթանակը Բաքվում անցկացվող ՖԻԴԵ–ի աշխարհի գավաթում

ԵՐԵՎԱՆ, 11 սեպտեմբերի– Sputnik. Հայ ուժեղագույն շախմատիստ Լևոն Արոնյանը Բաքվում անցկացվող ՖԻԴԵ–ի աշխարհի գավաթի մեկնարկային փուլի առաջին հանդիպման ժամանակ պարտության է մատնել Լյուքսեմբուրգը ներկայացնող Մայքլ Վեդենկելերին, հաղորդոմ է chessdom.ru կայքը։

Հայաստանը ներկայացնող Գաբրիել Սարգսյանը ոչ–ոքի է խաղացել լեհ Մատեուշ Բարտելի հետ։

Սամվել Տեր–Սահակյան–Նիկիտա Վիտիուգով և Հրանտ Մելքումյան–Գատա Կամսի հանդիպումները դեռևս շարունակվում են։

Աշխարհի շախմատի գավաթը կանցկացվի նոքաութ համակարգով սեպտեմբերի 10–ից հոկտեմբերի 4–ը Բաքվում։ Գավաթի համար կմրցեն 128 շախմատիստներ։

Ըստ կանոնների` մասնակիցները միմյանց հետ կխաղան երկու պարտիա`ժամանակի դասական վերահսկողությամբ (90 րոպե` առաջին 40 քայլի համար, այնուհետև 30 րոպե մինչև խաղի ավարտը` յուրաքանչյուր հաջորդ քայլի համար 30 վայրկյանի ավելացմամբ)։

Երկու հանդիպումներից հետո ոչ–ոքի արդյունքի դեպքում մրցակիցները կխաղան երկու պարտիա` 25+10 ժամանակով։ Եթե կրկին գրանցվի ոչ–ոքի, ապա կխաղան 10+10 երկու պարտիա, այնուհետև 5+3 երկու պարտիա։ Եթե դրանից հետո ևս մրցակիցները ոչ–ոքի խաղան, ապա նախատեսված է «արմագեդոն» (5-ը 4–ի վրա)+3` ոչ–ոքի սև խաղաքարերի օգտին։

Եզրափակչում շախմատիստները կխաղան չորս պարտիա` ՖԻԴԵ–ի վերահսկողությամբ։

Ընդհանուր մրցանակային ֆոնդը կազմում է 1,6 մլն դոլար, որից հաղթողը կստանա 96 հազար դոլար, եզրափակիչ դուրս եկած շախմատիստը` 64 հազար դոլար, կիսաեզրափակչում հայտնված շախմատիստը` 40 հազար դոլար, ¼ եզրափակչում հայտնված շախմատիստները` 28 հազարական դոլար։

Գավաթի հաղթողն ու եզրափակիչ դուրս եկած շախմատիստն իրավունք կստանա մասնակցել 2016 թ.–ի թեկնածուների մրցաշարին։

Մրցաշարը կավարտվի հոկտեմբերի 4–ին։