ԶԼՄ. ռուս ծրագրավորողի գլխի փոխպատվաստման վիրահատության օրն արդեն հայտնի է

ԵՐԵՎԱՆ, 11 սեպտեմբերի – Sputnik.  Ծրագրավորող Վալերի Սպիրիդոնովի գլխի փոխպատվաստման վիրահատությունը նշանակել են 2017 թվականի դեկտեմբերին, հայտնում է ամերիկյան Fox News հեռուստաալիքը։

30–ամյա Վալերի Սպիրիդոնովը տառապում է Վերդինգ–Հոֆմանի` ողնուղեղի ատրոֆիայի անբուժելի հիվանդությամբ, և նա, անտեսելով ռիսկերը, համաձայնել է գլխի փոխպատվաստման վիրահատության։

Վիրահատությունը կանցկացնի իտալացի նյարդավիրաբույժ Սերջո Կանավերոն։

Վիրահատությունը կարող է մինչև 36 ժամ տևել։ Ինչպես կարծում է Կանավերոն, եթե ամեն ինչ լավ ընթանա, երկու տարին բավարար ժամանակ է գիտական բոլոր հաշվարկներ կատարելու և վիրահատության մանրամասները դիտարկելու համար։

«Երբ հասկացա, որ կարող եմ մասնակցել այդքան ծավալուն և կարևոր գործի, ոչ մի կասկած չմնաց, և սկսեցի աշխատել այդ ուղղությամբ։ Այն ամենը, ինչ զգում եմ հիմա` հաճելի անհամբերությունն է, կարծես, ինչ–որ կարևոր իրադարձության եմ սպասել ողջ կյանքում, և այժմ դա սկսում է իրականանալ»,– Fox News–ը մեջբերում է Վալերի Սպիրիդոնովի խոսքը։