Հայ պատգամավորը Թուրքիայի մեջլիսում բարձրացրել է հայկական ճամբարի վրա իրականցված հարձակման հարցը

ԵՐԵՎԱՆ, 9 սեպտեմբերի – Sputnik. Թուրքիայի խորհրդարանի հայ պատգամավոր Գարո  Փայլանը գիշերը Թուզլայի հայկական «Քամփ Արմեն» ճամբարի ապամոնտաժման դեմ պայքարողների վրա ազգայնականների հարձակման հարցը բարձրացրել է մեջլիսում, հայտնում է ermenihaber.am կայքը։

Փայլանը Ներքին գործերի նախարար Սելամի Ալթընոքին 6 հարցից բաղկացած նամակ է ուղարկել` խնդրելով պատասխանել. 

1.    Արդյո՞ք 2015 թվականի սեպտեմբերի 8–ին «Քամփ Արմենի» վրա հարձակման փաստով հետաքննություն սկսվել է: Եթե ոչ, ապա ինչո՞ւ:

2.  Արդյո՞ք ՆԳՆ-ն անվտանգության միջոցներ ձեռնարկել է վերոնշյալ դեպքից հետո հետագա հնարավոր հարձակումների դեպքում ճամբարի կամավորների կյանքի անվտանգությունը ապահովելու ուղղությամբ:

3. 2015 թվականի օգոստոսի 13–ին «Քամփ Արմենի» վրա հարձակում իրականացրած անձանց նկատմամբ  հետաքնություն կատարվե՞լ է: Եթե այո, ապա ի՞նչ արդյունքներ են ստացվել: Իսկ եթե չի իրականացվել, ապա ինչո՞ւ:

4.   Պատահակա՞ն է, արդյոք, որ ճամբարի կամավորների վրա ակնհայտորեն սադրող բնույթ կրող հարձակումը համընկել է դիմադրության 125-րդ օրվա և 1955 թվականի սեպտեմբերի 6-7-ի դեպքերի 60-րդ տարելիցի հետ, թե՞ այն կազմակերպված ծրագրի մի մաս է:

5. «Քամփ Արմենի» վրա մահակներով հարձակված հանցագործների գործողությունները կազմակերպված քաոսային ծրագրի մաս լինելու հավանականության վերաբերյալ հետախուզական ստորաբաժանումները նախարարին տեղեկություն հաղորդե՞լ են:

6. «Քամփ Արմենի» վրա նախապես ծրագրված հարձակումների դեմ իրավապահ մարմինները ինչո՞ւ մինչ օրս անվտանգության միջոցներ չեն ձեռնարկել:

Սա «Քամփ Արմենի» վրա իրականացված 2-րդ հարձակումն է, առաջինը եղել էր ճամբարի ապամոնտաժման դեմ պայքարող երիտասարդների հերթապահության 100-րդ օրը: