ԵՐԵՎԱՆ, 9 սեպտեմբերի– Sputnik. Այսօր խորհրդային և հայկական կինոյի ականավոր գործիչներից մեկը` կինոօպերատոր և լեգենդար մանկավարժ Լևոն Աթոյանցը, դառնում է 85 տարեկան։
Sputnik Արմենիայի թղթակցի հետ զրույցում հոբելյարը խոսել է կյանքի և արվեստի մասին։
Ինձ դուր չի գալիս ցանկացած հեղափոխություն, հատկապես արվեստում։ Կարելի է հորինել սև խորանարդ, կարելի է` սև շրջան կամ եռանկյունի, միայն թե հիմարացնել մարդկանց։ Այդ արհեստական փիլիսոփայությունը կարելի է հեշտորեն կիրառել սև խորանարդի նկատմամբ։
Ինձ դուր չի գալիս, երբ ամերիկյան կինոյում բացասական հերոսներին այնքան գրավիչ են դարձնում, որ նրանց սիրահարվում են։
Տանել չեմ կարողանում Բոլոնյան համակարգը։ Մեխանիկորեն ճիշտ նշում ես կատարում, և դու արդեն հանճար են։
Եթե կարելի է հոմոսեքսուալների շքերթներ կազմակերպել, ապա ինչո՞ւ չի կարելի անցկացնել հարբեցողների շքերթներ։ Ինչո՞ւ չեն պաշտպանվում հարբեցողների իրավունքները։
20 տարի փողեր են հատկացնում ֆիլմեր ստեղծելու համար, իսկ երբ հեռուստացույց ես դիտում, մի սարսափը հետևում է մյուսին։
Այսօր մենք ամենաշատը բարության քարոզչության կարիք ունենք։
Բազմաթիվ ընկերներիցս ես մենակ եմ մնացել, հավանաբար ճակատագիրն ինձ թողել է, որպեսզի պատմեմ նրանց մասին։
Նրանք, ովքեր կինո են նկարահանում, «օպերատորներ» են, իսկ նրանք, ովքեր կոճակ են սեղմում և փող ստանում` «տեսանկարահանողներ»։
Նկարիչը յուղաներկերով նկարում է կտավի վրա, իսկ օպերատորը` լույսով էկրանի։
Բնությունն ինձ 85 տարեկան է տվել, իսկ թե որքան դեռ կա, ես չգիտեմ։
Լևոն Աթոյանցը ծնվել է 1930թ.–ի սեպտեմբերի 9–ին Թբիլիսիում։ 1954թ.–ին ավարտվել է Լենինգրադի կինոռեժիսորների ինստիտուտը։ 1955թ.–ից աշխատել է «Հայֆիլմ» կինոստուդիայում։ Նա մինչ օրս օպերատորական արվեստ է դասավանդում Երևանի թատրոնի և կինոյի պետական ինստիտուտում։ Աթոյանցը «Լևոն Աթոյանցի օպերատորական արվեստի դպրոցի» հիմնադիրն է։
Աթոյանցն իր ստեղծագործական կարիերայի ընթացքում նկարահանել է ավելի քան 30 գեղարվեստական և վավերագրական ֆիլմեր, որոնց թվում են` «Հեղնար աղբյուրը» (1970), «Մորգանի խնամին» (1970), «Զինվորն ու փիղը» (1977), «Խոշոր շահում» (1980), «Հայաստանի արվեստը» (1987), «Որտե՞ղ էիր, մարդ աստծո» (1992), «Տխուր փողոցի լուսաբացը» (2008). Աթոյանցն աշխատել է այնպիսի ռեժիսորների հետ, ինչպիսիք են Ալբերտ Մկրտչյանը, Արման Մանարյանը, Դմիրտի Քյոսայանցը։
Ծնունդդ շնորհավոր, վարպե՛տ, երկար տարիների կյանք ու առողջություն քեզ։
