ԵՐԵՎԱՆ, 9 սեպտեմբերի– Sputnik. Ռուսաստանում մշակվել է ԱՊՀ մասնակից պետությունների օդային–տիեզերական պաշտպանության հայեցակարգը, չորեքշաբթի լրագրողներին տեղեկացրել է ՌԴ օդային–տիեզերական ուժերի գլխավոր հրամանատարի առաջին տեղակալ Պավել Կուրաչենկոն։
«Ակնհայտ է, որ այսօր կան նոր սպառնալիքներ Ռուսաստանի և մեր դաշնակիցների համար։ Եվ բնական է, որ անհրաժեշտ է ճշտել օդում զինված պայքարի ձևերն ու միջոցները։ Այս հայեցակարգն առաջին հերթին կորոշի, թե պետական և ռազմական ինչ միջոցներ է անհրաժեշտ ձեռնարկել` մեր պետությունների անվտանգությունն ապահովելու համար», – նշել է գեներալը։
Միաժամանակ դեռևս չի նախատեսվում ստեղծել ՀՀՊ կոլեկտիվ համակարգեր ՀՕՊ միասնական համակարգերի շրջանակում։
«Սա ավելի հեռավոր հեռանկար է, առաջին փուլում հարկավոր է հավանություն տալ օդային–տիեզերական պաշտպանության հայեցակարգին, իսկ հետո արդեն լուծել ավելի առարկայական հարցեր, որոնք վերաբերում են հակահրթիռային պաշտպանության ստեղծմանը։ Սկզբից պետք է օրենսդրական բազա լինի», – պարզաբանել է Կուրաչենկոն։
Հայեցակարգի վրա աշխատել են երեք տարի։ Հիմնական մշակողը եղել է ՌԴ ՕՏՊ–ի կենտրոնական գիտահետազոտական ինստիտուտը, որը նաև ԱՊՀ ՀՕՊ միասնական համակարգի բազային կազմակերպությունն է։
«Հայեցակարգը մշակվել է և ուղարկվել դաշնակից պետությունների մեր գործընկերներին։ Ստացվել են արձագանքներ, մենք պարզել ենք բոլոր առարկությունները և քննարկել այդ հարցը Համակարգող կոմիտեի նիստի ժամանակ։ Այս հայեցակարգի նախագիծը հավանության է արժանացել», – ասել է Կուրաչենկոն։
Նրա խոսքով` նախատեսվում է հայեցակարգը ներկայացնել ԱՊՀ մասնակից պետությունների պաշտպանության նախարարների խորհրդի քննարկմանը և հաստատել այն մեկ տարվա ընթացքում։
«Սա կարևոր փաստաթուղթ է, որը պահանջում է ուսումնասիրություն և իրավական գնահատական», – եզրափակել է գեներալը։
ՌԴ–ում օդային–տիեզերական պաշտպանության հայեցակարգ է մշակվել ԱՊՀ երկրների համար
© Sputnik / Кирилл Каллиников
/ Բաժանորդագրվել
Այս հայեցակարգը որոշելու է, թե պետական և ռազմական ինչ միջոցներ են անհրաժեշտ` ԱՊՀ երկրների անվտանգությունն ապահովելու համար, տեղեկացրել է ՌԴ օդային–տիեզերական ուժերի գլխավոր հրամանատարի առաջին տեղակալ Պավել Կուրաչենկոն
