ԵՐԵՎԱՆ, 27 օգոստոսի — Sptunik. Պրիմորիեն կլինի «Գոնի» թայֆունի ազդեցության տակ, որը գրոհել էր տարածաշրջանը լույս հինգշաբթի գիշերը և կտևի դեռ երկու–երեք օր, հայտնում է Sptunik–ը` հղում անելով տեղի Հիդրոմետծառայության օդերևութաբանին։
«Հինգշաբթի ցերեկը Վլադիվոստոկում տեղումները կդադարեն, ոչ ուժեղ անձրև կտեղա ողջ օրվա ընթացքում, իսկ ուրբաթ երեկոյան կուժեղանա։ Առատ տեղումները կպահպանվեն քաղաքում դեռ երեք օրվա ընթացքում։ Արևմտյան, հարավային, հարավ–արևելյան շրջաններում հինգշաբթի կպահպանվեն առատ տեղումներ։ Իրավիճակն այնպես կդասավորվի, որ առավել առատ տեղումներ հաջորդ երկու օրերին կլինեն նույն շրջաններում, որտեղ այս գիշեր հորդառատ անձրև է եղել»,– պատմել է զրուցակիցը։
Ըստ նրա` մեկ գիշերվա ընթացքում Վլադիվոստոկում տեղումները կազմել են 61 միլիմետր, քաղաքամերձ շրջաններում` 66 միլիմետր, Նախոդկայում` 48 միլիմետր։
Քաղաքային իշխանությունների տվյալներով` թայֆունը ծովափնյա մայրաքաղաքի հասարակական տրանսպորտի աշխատանքում փոփոխություններ և լուրջ խախտումներ չի առաջացրել։ Հասարակական տրանսպորտը գործում է իր երթուղիներով։
«Գոնի»-ն (կորեերենից` «Կարապ») այս սեզոնում Խաղաղ օվկիանոսի վրա գոյացած 15–րդ թայֆունն է։ Ճապոնիայում թայֆունից տուժել է շուրջ 109 մարդ, չեղյալ են հայտարարվել ավելի քան 300 ներքին ավիաչվերթեր։
