ԵՐԵՎԱՆ, 22 օգոստոսի–Sputnik. Հայաստանի անսովոր շոգ եղանակը չի խանգարում, ընդհակառակը` էլ ավելի է ակտիվացնում քաղաքացիական ակտիվիստներին, այսպես ասած` «կրակի վրա յուղ է լցնում»:
«Ոտքի՛, Հայաստան» շարժման ակտիվիստները նախօրեին հավաքվել էին Երևանի Հանրապետության հրապարակում` իրենց պահանջները կառավարությանը ներկայացնելու համար: Ցուցարարներին միացել էին մի քանի տասնյակ մարդիկ, այդ թվում երիտասարդներ և ավագ տարիքի մարդիկ։
Սկիզբ…
Այն մասին, որ ուրբաթ երեկոյան Երևանի կենտրոնում ցույց են անցկացնելու, ակտիվիստները հայտնել էին մի քանի օր առաջ Facebook սոցցանցում` առաջարկելով բոլոր նրանց, ովքեր գալու են Հանրապետության հրապարակ, իրենց հետ բերեն ավտոմեքենաների անվադողեր: Այս փաստը շատերի մոտ հետաքրքրություն առաջացրեց:
«Ոտքի՛, Հայաստան» նախաձեռնության մասնակիցները բողոքում են երկրում էլեկտրաէներգիայի սակագների թանկացման, առաջիկա սահմանադրական փոփոխությունների, ինչպես նաև սպասվող «Հայաստանի էլցանցեր» ընկերության աուդիտի դեմ` ընդգծելով, որ այն արդար չի լինելու:
«Ոտքի՛, Հայաստան» քաղաքացիական շարժումն, ի տարբերություն «Ո՛չ թալանին» նախաձեռնության, քաղաքական բնույթ է կրում, իսկ շարժման առաջնորդներն ընդդիմադիր հայացքներ ունեն: Մասնավորապես, ակտիվիստների պահանջներից մեկը Հայաստանի գործող Հանրապետական կուսակցության հեռացումն է իշխանությունից և Հայաստանի հանրային ծառայությունները կարգավորող հանձնաժողովի (ՀԾԿՀ) ղեկավար Ռոբերտ Նազարյանի հրաժարականը:
… բախում
Բողոքի ակցիան առաջին իսկ րոպեներից սկանդալներով էր ընթանում: Գլխավոր համակարգող, Հայաստանի նախագահի նախկին թեկնածու Անդրիաս Ղուկասյանը ժամը 18:40-ին ոստիկանության կենտրոնական բաժին բերման ենթարկվեց «ապօրինի գործողությունների» համար: Մասնավորապես, իրավապահ մարմինների աշխատակիցները Ղուկասյանի և ևս մի քանի քաղաքացու ձերբակալությունը բացատրեցին նրանով, որ նրանք փորձել են ակցիայի անցկացման վայր բերել ավտոմեքենաների անվադողեր, ինչն անօրինական է և նախապես չի համաձայնեցվել ոստիկանության հետ:
Իրենք` ակտիվիստները, նման «յուրօրինակ» որոշումը բացատրել էին նրանով, որ ցանկացել են մայրաքաղաքի կենտրոնական հրապարակում բեմ կառուցել, որից ավելի հեշտ կլիներ ելույթ ունենալ և բացատրել հավաքվածներին իրենց պահանջները:
Ակտիվիստների կարճատև ելույթներից հետո մի քանի անձինք, այդ թվում` ավագ տարիքի տղամարդիկ, փորձեցին փակել երթևեկությունը` նստելով հենց Հանրապետության հրապարակի երթևեկելի հատվածում: Ոստիկանության աշխատակիցներն իսկույն արձագանքեցին այդ գործողություններին և մոտենալով ցուցարարներին` սկսեցին ցրել նրանց:
Բնականաբար, ակտիվիստները դիմադրություն ցուցաբերեցին` պնդելով, որ կշարունակեն իրենց անհնազանդությունը մինչև կալանավորներին ազատ արձակեն: Ոստիկանությունը սկսեց ցուցարարներին հեռացնել երթևեկելի գոտուց` քաշքշելով նրանց ձեռքերից և ոտքերից
Ընդհանուր իրարանցման մեջ ոստիկաններից մեկը բիրտ ուժ կիրառեց տարեց տղամարդու հանդեպ: Ոստիկանը ապտակեց նրան, ինչի հետևանքով վերջինիս լսողական սարքը դուրս եկավ ականջից և կոտրվեց: Դրանից հետո քաղաքացիների բողոքի ալիքն ավելի թեժացավ և սկսեց ագրեսիվ բնույթ կրել: Ակցիայի մասնակիցներից մեկին, ում վիճակը հանկարծակի վատացավ, շտապօգնության մեքենայով տեղափոխեցին հիվանդանոց: Ցանկացած բողոքի ակցիայի դասական պատկեր էր:
«Խնջույքը» շարունակվեց
Որոշ ժամանակ անց ցուցարարներին միացավ Անդրիաս Ղուկասյանը, ով նշեց, որ իրեն ազատ են արձակել, «անվադողերը խոստացել են վերադարձնել շաբաթ օրը, սպասենք, որ մնացածներին էլ ազատ արձակեն»: Ղուկասյանը վրդովմունք հայտնեց այն բանի համար, որ ոստիկանությունն իրենց գործողություններն անօրինական է անվանում` ոչ մի հղում չանելով օրենսդրության որևէ հոդվածի:
Կեսգիշերն անց երիտասարդ ակտիվիստների խումբը կրկին որոշեց նստացույց անել` հասարակական տրանսպորտի երթևեկությանը խոչընդոտելով, սակայն ոստիկանները կրկին կանխեցին այդ փորձը: Նրանք ակտիվիստներին դուրս բերեցին երթևեկելի մասից:
Իսկ հետո՞…
Շատերը կարծում էին, որ այս ցույցը կարող էր կրկնել ամռան սկզբին Բաղրամյան պողոտայում անցկացված էլեկտրաէներգիայի թանկացման դեմ զանգվածային ցույցի «հաջողությունը», սակայն դա տեղի չունեցավ:
Թեև շարժումը քիչ «համախոհներ» ունի և ոստիկանությունն անընդհատ խոչընդոտում է նրանց գործողություններին Երևանի կենտրոնում, ակտիվիստները մտադիր են շարունակել առաջ տանել իրենց գաղափարները: Նրանք արդեն հստակ պահանջներով նամակ են ուղղել Հայաստանի կառավարությանը:
