Թուրքիան Իրանի հետ համաձայնագիրն անվանել է ուշացած, բայց գոհ է դրանից

ԵՐԵՎԱՆ, հուլիսի 14– Sputnik. Անկարան բավարարված է Իրանի միջուկային ծրագրի շուրջ համաձայնագրից, թեև այն ուշացած է համարում, երեքշաբթի հայտարարել է Թուրքիայի վարչապետ Ահմեդ Դավութօղլուն, հաղորդում է ՌԻԱ Նովոստին։

«Իրանի հարցով Թուրքիայի դիրքորոշումն անփոփոխ է մնում դեռ 2010թ.–ից, և մեր դիվանագիտական ջանքերը հայտնի են։ Ավելի լավ կլիներ այդ համաձայնությունն ավելի վաղ ձեռք բերել։ Կարծում եմ, որ իզուր շատ ժամանակ է կորել։ Սակայն համաձայնագրի հասնելու հետ կապված իրավիճակը մեզ լիովին բավարարում է։ Հաջողություն եմ մաղթում դրա իրականացման գործում»,– լրագրողներին Անկարայում ասել է Դավութօղլուն։

Իրանն ու միջազգային միջնորդների «վեցնյակը» հուլիսի 14–ին եկան պատմական համաձայնության, որը վերաբերում է իրանական ատոմի երկարատև խնդրի կարգավորմանը։ Բարդագույն բանակցություններն ավարտվեցին գործողությունների համատեղ համապարփակ ծրագրի ընդունմամբ, որի իրականացման արդյունքում ՄԱԿ ԱԽ–ն, ԱՄՆ–ն և Եվրամիությունն ամբողջովին կհանեն Իրանի նկատմամբ ավելի վաղ ներդրված տնտեսական և ֆինանսական պատժամիջոցները։