ԵՐԵՎԱՆ, 13 մարտի – Sputnik. Գործարար, բարերար, «Ուժեղ Հայաստան» կուսակցության նախագահ Սամվել Կարապետյանի աջակիցները բողոքի ակցիա են անում կառավարության շենքի դիմաց։ «Հայաստանն ուժեղ է Սամվել Կարապետյանի հետ», «Ազատություն Սամվել Կարապետյանին, ազատություն Հայաստանին» պաստառներով և «ազատությո՛ւն» վանկարկումներով նրանք պահանջում են ՀՀ վարչապետ Նիկոլ Փաշինյանից վերջ տալ զանգովի արդարադատությանը։
Նշենք, որ այսօր Հակակոռուպցիոն դատարանը քննելու է Սամվել Կարապետյանի խափանման միջոցի հարցը։
«Պահանջում ենք վերջ տալ անօրինական գործողություններին, որպեսզի Հայաստանում այլևս չլինեն քաղբանտարկյալներ։ Մենք պահանջում ենք, որ կառավարության անդամներից մեկն իջնի ներքև, քանի որ փոխանցելու բան ունենք»,- լրագրողների հետ զրույցում ասաց «Ուժեղ Հայաստան» կուսակցության անդամ Արթուր Միքայելյանը։
Նրա խոսքով` Հայաստանում որևէ բան չի որոշվում օրենքի և Սահմանադրության շրջանակում, ամեն ինչ որոշում է միայն Նիկոլ Փաշինյանը։
«Հայաստանը լեփ-լեցուն է քաղաքական բանտարկյալներով, շատերը գտնվում են տնային կալանքի տակ։ Այս ամենը խոսում է մի բանի մասին՝ ՀՀ գործող վարչապետ Նիկոլ Փաշինյանը գործում է բացառապես իր վախերի շրջանակում։ Նա, վախենալով մարդկանցից և իր աթոռը կորցնելուց, մարդկանց զրկում է խոսքի ազատությունից»,- ասաց Միքայելյանը։
Ակցիայի մասնակիցները կառավարության ղեկավարի համար հեռախոս էին բերել՝ ի պատասխան Փաշինյանի հայտարարության, թե կարող են Կարապետյանին հեռախոսով ապահովել ժողովրդի հետ կապի համար։
Կառավարությունից որևէ մեկը չմոտեցավ ակցիայի մասնակիցներին։ Նրանք փորձեցին հանձնել հեռախոսը, սակայն ոստիկանությունը նրանց հայտնեց, որ այստեղ կարող են ընդունել միայն ծրարներ՝ նամակների տեսքով։ «Ուժեղ Հայաստան» կուսակցության անդամ Արթուր Միքայելյանը հեռախոսը թողեց կառավարության շենքի դիմաց։
Հիշեցնենք` հունիսի 17-ին Սամվել Կարապետյանի տանը խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա: Կարապետյանը կալանավորվեց հունիսի 18-ին։
Կարապետյանին մեղադրանք առաջադրվեց ՔՕ 290 (հարկերը, տուրքերը կամ այլ վճարներ չվճարել), 296 (փողերի լվացում), 422 (իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերը) հոդվածներով։
Հոկտեմբերի 13-ին հայտնի դարձավ, որ Սամվել Կարապետյանի մեղադրանքը փոփոխվել է, ավելացվել է Քրեական օրենսգրքի 296-րդ հոդվածի 3-րդ մասի 2-րդ և 3-րդ կետերով նախատեսված մեղադրանքը՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով՝ առանձնապես խոշոր չափերով փողերի լվացում։
Դեկտեմբերի 30-ին դատարանը փոխեց գործարարի խափանման միջոցը, և կալանքը փոխարինվեց գրավով և տնային կալանքով։ Նույն օրը նա ՔԿՀ–ից տեղափոխվեց տուն։