Հայաստանի վարչապետ Նիկոլ Փաշինյանը կրկին Հովհաննավանքում է. նոր տարվա առաջին կիրակի օրը վարչապետը մեկնել է վանք, որը փաստացի խլվել է Մայր աթոռ սուրբ Էջմիածնից:
Այնտեղ հերթական «պատարագ» է մատուցում կարգալույծ արված Ստեփան (Արամ) Ասատրյանը։ Ներկաների թվում է նաև Թալինի եկեղեցու նախկին հոգևոր հովիվ, կարգալույծ արված Արամայիս (Թադե) Թախմազյանը:
Վարչապետին ուղեկցում են էկոնոմիկայի նախարար Գևորգ Պապոյանը, Արագածոտնի մարզպետ Սերգեյ Մովսիսյանը և իշխող խմբակցության ներկայացուցիչներից մեկը՝ Ալխաս Ղազարյանը:
Հիշեցնենք, որ հոկտեմբերի 21-ին Գարեգին Երկրորդ Ծայրագույն Պատրիարք և Ամենայն Հայոց կաթողիկոսի հայրապետական տնօրինությամբ կարգալույծ է հռչակվել Տ․ Արամ քահանա Ասատրյանը։ Սակայն կարգալույծ լինելուց հետա Ստեփան Ասատրյանը մինչ օրս չի լքել վանքը։
Հիշեցնենք` տևական ժամանակ է` ՀՀ իշխանությունը արշավ է սկսել եկեղեցու ու հատկապես կաթողիկոսի դեմ։ Ճաղերի հետևում են «Սրբազան պայքար» շարժման առաջնորդ Բագրատ արքեպիսկոպոս Գալստանյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ սրբազանը, Մայր աթոռի դիվանապետ Արշակ արքեպիսկոպոս Խաչատրյանը։
Հիշեցնենք, որ դեկտեմբերի 18–ին կաթողիկոսի հրաժարականը պահանջող 10 եպիսկոպոսները գնացին Մայր աթոռ և Գարեգին Բ–ի հեռացման պահանջով նամակ փոխանցեցին քարտուղարությանը։ Այնուհետև քաղաքացիական հագուստով իրավապահները եպիսկոպոսներին միկրոավտոբուսով դուրս բերեցին Մայր աթոռի տարածքից։