ԵՐԵՎԱՆ, 11 նոյեմբերի - Sputnik. ՀՀ 3–րդ նախագահ Սերժ Սարգսյանը մեկնաբանել է ՀՀ վարչապետ Նիկոլ Փաշինյանի հայտարարությունը 2019 թվականի բանակցային փաստաթղթերը հրապարակելու վերաբերյալ։
Նշենք, որ «Իմնեմնիմի» փոդքասթի ժամանակ Սերժ Սարգսյանը վստահություն էր հայտնել, որ 44–օրյա պատերազմը կարող էր չլինել, եթե իշխանությունը չխուսափեր կամ ընդհանրապես չհրաժարվեր բանակցային գործընթացից։ Փաշինյանն արձագանքել էր` խոստանալով մինչև տարեվերջ հրապարակել Հայաստանի ու Ադրբեջանի բանակցային պատմության առանցքային փաստաթղթերը` դրանցում ներառելով նաև Սերժ Սարգսյանի գրած մի նամակ։
«Կարևորն այն է, որ կարողացանք կորզել, որ գոնե խոստանա բանակցային փաստաթղթերը հրապարակել»,– Հակակոռուպցիոն դատարանի դիմաց լրագրողների հետ զրույցում ասաց Սարգսյանը։
Արձագանքելով իշխանության մեղադրանքներին, թե նախկին նախագահներն ու Ադրբեջանի իշխանությունները միևնույն մեղադրանքներ են հնչեցնում գործող իշխանության հասցեին` Սերժ Սարգսյանն ասաց, որ դա բխում է սեփական անկարողությունից։
«Պետք չի սեփական անճարությունն ուրիշներին վերագրել»,– նշեց ՀՀ 3–րդ նախագահը։
Նա խոսեց նաև իրեն առաջադրված նոր մեղադրանքից` ասելով, թե վստահ է, որ միացնելու են մյուս գործերին։
Հիշեցնենք` ՀՀ երրորդ նախագահին առնչվող 4 գործերը քննվում են 2 վարույթում։ Այսպես կոչված «Դիզելի գործը» միացվել է այն գործին, որում շոշափվում են ՀՀ երկրորդ նախագահ Ռոբերտ Քոչարյանի ավագ որդու՝ Սեդրակ Քոչարյանի և նախկին խոշոր գործարար Միխայիլ Բաղդասարովի անունները: Իսկ գործարար Սիլվա Համբարձումյանից կաշառք վերցնելու և Իսակովի պողոտայում հողեր օտարելու գործերը միացվել են մեկ այլ վարույթում։
Նոյեմբերի 6–ին հայտնի դարձավ, որ ՀՀ 3–րդ նախագահ Սերժ Սարգսյանին նոր մեղադրանք է առաջադրվել կաշառք ստանալու հոդվածով։