ԵՐԵՎԱՆ, 26 հոկտեմբերի - Sputnik. Հովհանավանքում քիչ առաջ միջադեպ տեղի ունեցավ, որից հետո ոստիկանը քաղաքացիներից մեկին ուժով հանեցին եկեղեցուց ու բերման ենթարկեցին։ Տեղեկությունը Հովհաննավանքից հայտնում է Sputnik Արմենիայի թղթակիցը։
Հայտնել էինք, որ կարգալույծ արված Ստեփան Ասատրյանը (նախկինում` տեր Արամ քահանա) Հովհաննավանքում «պատարագ» է մատուցում, որին մասնակցում են իշխանական վերնախավը` ՀՀ վարչապետ Նիկոլ Փաշինյանի գլխավորությամբ։ Այստեղ են հավաքվել նաև ՔՊ–ականների համախոհները։
Քաղաքացիներից մեկը Հովհաննավանքում բղավեց. «Ստեփան Ասատրյա՛ն, դու իրավունք չունես պատարագ մատուցելու»։
Տեղում ՀՀ վարչապետ Նիկոլ Փաշինյանի անվտանգության աշխատակիցներից մեկը անմիջապես փակեց քաղաքացու բերանն ու հանեց նրան եկեղեցուց։
Ինչպես հայտնի է, տևական ժամանակ է` ՀՀ իշխանությունը արշավ է սկսել եկեղեցու ու հատկապես Ամենայն հայոց կաթողիկոս Գարեգին Բ–ի դեմ։ Ճաղերի հետևում են «Սրբազան պայքար» շարժման առաջնորդ Բագրատ արքեպիսկոպոս Գալստանյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ սրբազանը և Արագածոտնի թեմի դիվանապետԳարեգին Արսենյանը։
Հոկտեմբերի 21–ին Ամենայն հայոց կաթողիկոս Գարեգին Երկրորդի տնօրինությամբ կարգալույծ է հռչակվել տեր Արամ քահանա Ասատրյանը (ավազանի անունը` Ստեփան Ասատրյան): ՀԱԵ-ի կողմից կարգալույծ արված, իրեն Նիկոլ Փաշինյանի անվերապահ աջակից հռչակած Ստեփան Ասատրյանը, սակայն, հոկտեմբերի 26-ին ինքնահռչակ կերպով «պատարագ» է հայտարարել Հովհաննավանք եկեղեցում՝ հրապարակավ սպառնալով 10.000 մարդու ներկայություն ապահովել այդ միջոցառմանը, որին իր մասնակցության մասին նախապես հայտարարել էր նաև Նիկոլ Փաշինյանը: