Սամվել Կարապետյանի խափանման միջոցը Վերաքննիչ դատարանը թողել է անփոփոխ

ԵՐԵՎԱՆ, 4 հուլիսի – Sputnik․ Գործարար, բարերար Սամվել Կարապետյանի խափանման միջոցը Վերաքննիչ դատարանը թողել է անփոփոխ։ Այս մասին Sputnik Արմենիային հայտնեցին դատական դեպարտամենտից։

Սամվել Կարապետյանի կալանքի որոշումը հունիսի 19–ին բողոքարկման էր ներկայացրել Վերաքննիչ քրեական դատարան։

Հունիսի 23–ին հայտնի դարձավ, որ Սամվել Կարապետյանի եղբայրը` Կարեն Կարապետյանը, հետ է վերցնում Վերաքննիչ բողոքը, քանի որ այն մակագրվել էր ամենից ցածր վարկանիշ ունեցող դատավոր Արմեն Դանիելյանին։

Ավելի ուշ պարզ դարձավ, որ կատարվել է ամեն ինչ, որպեսզի միայն Արմեն Դանիելյանը քննության առնի Սամվել Կարապետյանի կալանքի վերաբերյալ բողոքը:

Միաժամանակ նա նշել էր, որ Մարդու իրավունքների եվրոպական դատարան անհապաղ գանգատ ներկայացնելու ուղղությամբ անհրաժեշտ նախապատրաստական գործողությունները գրեթե ավարտին են հասցվել։

Հիշեցնենք` Սամվել Կարապետյանի տանը հունիսի 17-ին խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա:

Նրա հայտարարությունից հետո ՀՀ վարչապետ Նիկոլ Փաշինյանը գործարարին ուղղված վիրավորական և սպառնալի գրառումներ արեց սոցցանցերում։

Ավելի ուշ ՔԿ–ն հայտնեց, որ 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Սամվել Կարապետյանը զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ:

Հունիսի 18-ին Սամվել Կարապետյանը 2 ամսով կալանավորվեց։ Այժմ նա «Երևան–Կենտրոն» ՔԿՀ–ում է։