ԵՐԵՎԱՆ, 10 մարտի – Sputnik․ Հայաստանի մարդու իրավունքների պաշտպան Անահիտ Մանասյանը խնդրահարույց է համարում «Զինվորական ծառայության և զինծառայողի կարգավիճակի մասին» ՀՀ օրենքում փոփոխությունների նախագիծը։ Այս մասին հայտնում են պաշտպանի գրասենյակից։
Մանասյանը մատնանշում է, մասնավորապես, զինծառայողներին բնակարանային պայմանների բարելավման շահառու դիտարկելու համար գործող 30 կիլոմետրը 60 կիլոմետրով փոխարինելու մասին կետը։
Նախագծով առաջարկվում է նաև սահմանել, որ վարձակալության պայմանագրի պետական գրանցման ծախսերն իրականացվում են պետական բյուջեի միջոցների հաշվին՝ բյուջետային տարվա ընթացքում մեկ անգամ։
«Նախագիծը խնդրահարույց է նաև այն առումով, որ դրան տրվում է հետադարձություն և պարունակում է զինծառայողների իրավական վիճակը վատթարացնող դրույթ»,- նշված է պաշտպանի հայտարարության մեջ։
ՄԻՊ-ն ընդգծում է, որ նախագծի վերաբերյալ զինծառայողներից և նրանց ընտանիքների անդամներից պարբերաբար բողոքներ են ստացվում:
Մարդու իրավունքների պաշտպանն արձանագրում է, որ շրջանառվող նախագիծն առավել է խորացրել գոյություն ունեցող մտահոգությունները:
Ավելի վաղ «Հայաստան» դաշինքի պատգամավոր Գեղամ Մանուկյանը հայտարարել էր, որ Հայաստանի կառավարությունը ցանկանում է կրճատել կադրային զինծառայողների համար բնակարանների վարձակալության վճարները։
Պատգամավորը խորհրդարանում հիշեցրել էր, որ հիմա կադրային սպաները փոխհատուցում են ստանում բնակարանների վարձակալության համար, եթե նրանց ծառայության վայրը գտնվում է իրենց մշտական բնակության վայրից 30 կմ հեռավորության վրա։ Ֆինանսների նախարարությունն առաջարկում է այդ հեռավորությունը հասցնել առնվազն 60 կմ-ի։
Մանուկյանը նկատել էր, որ այս փոփոխության հետևանքով հազարավոր զինծառայողներ ստիպված կլինեն ամեն օր սեփական միջոցներով անցնել 60 կմ ճանապարհ, որ հասնեն ծառայության վայր: