ԵՐԵՎԱՆ, 12 հունիսի – Sputnik. Երևանի Բաղրամյան պողոտայում տեղի ունեցած ակցիայի մասնակիցներից 6–ը բերման են ենթարկվել քրեական վարույթի շրջանակում։ Տեղեկությունը Sputnik Արմենիային հայտնեց փաստաբան Ռուբեն Մելիքյանը։
Ավելի վաղ տեղեկացրել էինք, որ ՔԿ–ն Ազգային ժողովի մոտ տեղի ունեցած բախումներից հետո քրեական վարույթ է նախաձեռնել զանգվածային անկարգություններին մասնակցելու հոդվածով։
«Մենք հիմա փաստաբաններով գնում ենք բաժիններ, փորձում ենք տեղեկություններ ճշտել ձերբակալվածների մասին, այս պահին դեռ շատ չի հաջողվում։ Բայց միայն 6 հոգու անուն ունենք այս պահին»,– ասաց Մելիքյանը։
Փաստաբանը տեղեկացրեց, որ ձերբակալվածներից մեկը «Սիսական» ջոկատի հրամանատար Աշոտ Մինասյանն է (Աշոտ Երկաթը)։
Ինչ վերաբերում է Սուրեն Պետրոսյանին, որը «Տավուշը հանուն հայրենիքի» շարժման առաջնորդներից է, ապա փաստաբանը նշեց, որ նրան հայտնաբերել դեռ չի հաջողվում։ Մելիքյանի տեղեկություններով` Սուրեն Պետրոսյանին տարել են քաղաքացիական հագուստով մարդիկ։
Հիշեցնենք` այսօր Բաղրամյան պողոտայում բախումներ սկսվեցին ոստիկանների և «Տավուշը հանուն հայրենիքի» շարժման անդամների ու կողմնակիցների միջև։ Ոստիկանությունը լուսաձայնային նռնակներ կիրառեց։
Վերջին տվյալներով` Բաղրամյան պողոտայում տեղի ունեցած իրադարձությունների հետևանքով բուժօգնության է դիմել 79 քաղաքացիական անձ և ոստիկան։ 6 պացիենտ անհրաժեշտ բուժօգնություն ստանալուց հետո դուրս են գրվել։
23։00-ի դրությամբ՝ բերման է ենթարկվել 98 անձ։