ԵՐԵՎԱՆ, 13 մայիսի – Sputnik. Վայոց Ձորի մարզի Մալիշկա բնակավայրի տարածքում մայիսի 10–ին Մեղրի-Երևան միջպետական ճանապարհը փակած քաղաքացիներից մեկը կալանավորվել է։ Տեղեկությունը հայտնում է ՀՀ քննչական կոմիտեն` նշելով, որ ակցիայի մասնակիցն առերևույթ բռնություն է գործադրել ոստիկանի նկատմամբ։
Ըստ հաղորդագրության` հասարակական կարգի պահպանություն իրականացնող ոստիկանները ճանապարհը բացելու և երթևեկությունը վերականգնելու օրինական պահանջ են ներկայացրել ակցիայի մասնակիցներին, սակայն նրանցից մեկը բռնություն է գործադրել ոստիկանի նկատմամբ՝ բռունցքով հարվածելով նրա գլխին։
Նրա նկատմամբ ՀՀ քրեական օրենսգրքի 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը) հարուցվել է հանրային քրեական հետապնդում և նրան ներկայացվել է մեղադրանք։
Միջնորդություն է ներկայացվել դատարան՝ նրա նկատմամբ կալանքը որպես խափանման միջոց ընտրելու վերաբերյալ, որը բավարարվել է։
Նախաքննությունը շարունակվում է։
Հիշեցնենք, որ հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից սկսել անհնազանդության խաղաղ ակցիաներ ամբողջ հանրապետությունում։