ԵՐԵՎԱՆ, 9 մայիսի - Sputnik. ՀԱԵ տավջուշի թեմի առաջնորդ Բագրատ արքեպիսկոպոս Գալստանյանը ոտքերի հետ կապված խնդիրների պատճառով ժամանակավորապես հեռացել է Հանրապետության հրապարակից, սակայն խոստացել է շուտով վերադառնալ:
Գալստանյանի խոսքով տեսանյութը հրապարակել է «Ազգային ճակատ» տելեգրամյան ալիքը։
«Որոշ ժամանակ անց ես կգամ հրապարակ և կհանդիպեմ ձեզ, սիրելի ժողովուրդ։ Ես եկել եմ, որ ոտքերս բուժեն, որոնք այտուցվել են, ոտքերիս վրա քերծվածքներ ու վերքեր կան», - ասաց Գալստանյանը։
Նրա խոսքով՝ ինքը ստիպված է հրապարակել այդ տեսանյութը, քանի որ իշխող թիմը լուրեր է տարածում, թե իբր հանդիպում է ՀՀ երկրորդ ու երրորդ նախագահներ Ռոբերտ Քոչարյանի ու Սերժ Սարգսյանի հետ:
Ավելի ուշ նա արդեն վերադարձել էր հրապարակ, որտեղ հայտարարեց՝ վարչապետի թեկնածուի վերաբերյալ առայժմ որոշում չունեն։
Նա կոչ արեց բոլորին ցրվել, սակայն առավոտյան ժամը 10:00-ին «մեկ զինվորի պես» գան և լինեն հրապարակում, իսկ ինքը կգիշերի այդտեղ։
Հիշեցնենք՝ «Տավուշը հանուն հայրենիքի» շարժման կողմնակիցները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից քայլերթով շարժվել են Երևան` միակողմանի սահմանազատման գործընթացը կասեցնելու նպատակով։
Մայիսի 9-ին երթի մասնակիցները հասան Երևանի Հանրապետության հրապարակ, որտեղ մեծ հանրահավաք անցկացվեց։ Շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, որը տեղի չունեցավ։
Դրանից հետո նա կոչ արեց մայիսի 10-ին սկսել անհնազանդության խաղաղ ակցիաներ ամբողջ հանրապետությունում։