ԵՐԵՎԱՆ, 4 օգոստոսի -Sputnik. Հայաստանը կրկին այն երկրների ցանկում է, ուր ամենից հաճախ են ամառային հանգստն անցկացնելու հանար մեկնում ռուսները։ Միևնույն ժամանակ, մերձավոր արտերկրի երկրների շարքում այս ամառ օրավարձով բնակարանն ավելի թանկ է, քան ՌԴ–ում (5520 ռուբլի կամ մոտ 22 410 դրամ): Նման տվյալներ է ներկայացնում Суточно.ру հանգստի ամրագրման համար նախատեսված առցանց ռուսական ծառայության գործադիր տնօրեն Յուրի Կուզնեցովը, փոխանցում է ՏԱՍՍ-ը։
Նրա խոսքով՝ մերձավոր երկրներում ամռանը զբոսաշրջիկների համար բնակարանների վարձակալությունը նախորդ տարվա նույն ժամանակահատվածի համեմատ թանկացել է 52%–ով՝ մեկ գիշերվա համար մինչև 4,38 հազար ռուբլի (մոտ 17 780 դրամ): Ռուս զբոսաշրջիկները հիմնականում այցելում են Բելառուս, Աբխազիա և Վրաստան։
Տարվա կտրվածքով միջին գներն աճել են 66% -ով։ Ուզբեկստանում օրավարձով բնակարանների վարձակալության միջին արժեքը կազմում է 4 490 ռուբլի կամ մոտ 12 230 դրամ (+29%), Բելառուսում՝ 4 220 ռուբլի կամ 17130 դրամ (+35%), Աբխազիայում՝ 4 160 ռուբլի կամ 16 890 դրամ (+31%), Ադրբեջանում՝ 3 860 ռուբլի կամ 15670 դրամ (+68%), Վրաստանում՝ 3 740 ռուբլի կամ 15140 դրամ (+58%), Ղազախստանում՝ 3 640 ռուբլի կամ 14780 դրամ(+104%), Ղրղզստանում՝ 3 520 ռուբլի կամ 14 290 դրամ (+85%)։
Ընդ որում, եթե ռուս զբոսաշրջիկները Բելառուս և Ղրղզստան մեկնում են միջինը երեք օրով, Ուզբեկստան ու Ղազախստան՝ չորս օրով, ապա Հայաստան ուղևորությունը հինգ օր է տևում։
Ռուսաստանցիները ամենաերկար ուղևորությունները կատարում են Վրաստան և Աբխազիա՝ 7-8 օրով։
Միևնույն ժամանակ, զբոսաշրջիկներն ամենաշատ գումարը ծախսում են Աբխազիա մեկնելու համար՝ 33 610 ռուբլի (136 460 դրամ): Ադրբեջանում և Հայաստանում ռուսները ծախսում են 27 900 ռուբլի (մոտ 113.270 դրամ) (համապատասխանաբար +61% և 10%):
Դեպի Հայաստան մեկնելու համար ամրագրումների թիվը կազմել է 2,7%, Ադրբեջան՝ 1,1%, Ղրղզստան՝ 0,6%, Ուզբեկստան՝ 0,4%, Վրաստան՝ 11,4%: