ԵՐԵՎԱՆ, 2 օգոստոսի – Sputnik. Զենքի վաճառքով զբաղվող Դավիթ Գալստյանը` «Պատրոն Դավոն», կրկին կալանավորվել է։ Տեղեկությունը հայտնում է «Դատական իշխանություն» Telegarm–յան ալիքը։
Դավիթ Գալստյանը նախորդ ամիս առաջին ատյանի դատարանի կողմից գրավի դիմաց ազատ էր արձակվել։ Նրա փաստաբան Արմեն Հարությունյանը օգոստոսի 1-ն Sputnik Արմենիայի հետ զրույցում ասել էր, որ ՀՀ վերաքննիչ դատարանը բեկանել է Հակակոռուպցիոն դատարանի՝ Դավիթ Գալստյանին գրավի դիմաց ազատ արձակելու որոշումը, և նա կրկին կկալանավորվի։
«ՀՀ վերաքննիչ հակակոռուպցիոն դատարանի կողմից նա կրկին կալանավորվել է, քանի որ մեղադրող կողմը դատարանին ներկայացրել է նոր փաստեր առ այն, որ ամբաստանյալը, հայտնվելով ազատության մեջ, փորձել է խոչընդոտել գործի քննությունը՝ դատավարության մասնակիցների վրա անօրինական ազդեցություն գործադրելու միջոցով»,– նշված է հրապարակման մեջ։
Հիշեցնենք` Դավիթ Գալստյանը մեղադրյալի կարգավիճակ ունի մի քանի գործով։ Դրանցից մեկը վերաբերում է անպիտան հրթիռներ ձեռք բերելուն, որով նաև պաշտպանության նախկին նախարար Դավիթ Տոնոյանն է անցնում։ 2021թ–ի սեպտեմբերի 30-ին ԱԱԾ–ն հայտնեց, որ Տոնոյանն ու Գալստյանը ձերբակալվել են առանձնապես խոշոր չափերի հափշտակություն կատարելու կասկածանքով։ Նույն օրը Տոնոյանն ու Գալստյանը կալանավորվեցին։
2022–ի մարտին Վերաքննիչ դատարանն ազատ արձակեց Դավիթ Գալստյանին 50 մլն գրավի դիմաց։
Գալստյանը 2–րդ անգամ կալանավորվեց 2023–ի հունվարի 31–ին։ Շուրջ 5 ամիս անց` հունիսի 28–ին, Հակակոռուպցիոն դատարանը վճռեց 40 մլն դրամ գրավի դիմաց ազատ արձակել գործարարին։
Այս գործով մեղադրանք է առաջադրվել նաև ԳՇ պետ Արտակ Դավթյանին, ԳՇ պետի նախկին տեղակալ Ստեփան Գալստյանին, ՀՀ ՊՆ ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին: