ԵՐԵՎԱՆ, 10 մայիսի – Sputnik. Ռուսաստանի նախագահ Վլադիմիր Պուտինը Պետդումա է մտցրել Եվրոպայում սովորական զինված ուժերի դենոնսացիայի մասին օրինագիծը։ Այս մասին հայտնում է ՏԱՍՍ–ը` հղում անելով Պետդումայի տվյալների բազայում հրապարակած փաստաթղթին։
Ավելի վաղ երկրի ղեկավարը ՌԴ փոխարտգործնախարար Սերգեյ Ռյաբկովին իր պաշտոնական ներկայացուցիչն էր նշանակել Եվրոպայում սովորական զինված ուժերի դենոնսացիան խորհրդարանում քննարկելու ժամանակ։
Օրինագիծն ուղեկցող բացատրական գրության մեջ նշվում է, որ պայմանագիրը «90-ականների սկզբի համար եվրոպական անվտանգության ամրապնդման բավական գործուն և արդյունավետ գործիք էր»։
«90-ականների սկզբից պայմանագիրը լայնածավալ ռազմաքաղաքական, նախևառաջ ՆԱՏՕ–ի ընդլայնման հետ կապված փոփոխությունների ազդեցության ներքո հնացել է և կորցրել աղերսն իրականության հետ։ Արևմուտքի երկրների վերաբերմունքը եվրոպական անվտանգությունն ապահովելու հարցերի վերաբերյալ փոխելու նպատակով ՌԴ–ի նկատմամբ պայմանագրի գործողությունը դադարեցվել է։ 2007 թվականից ի վեր Եվրոպայում սովորական սպառազինության ոլորտում իրավիճակը նկատելիորեն վատթարացել է», – ասվում է փաստաթղթում։
Նշվում է, որ «ԱՄՆ–ն և նրա դաշնակիցները ՌԴ-ի հետ ռազմական առճակատման քաղաքականություն են վարում, ինչը կարող է աղետալի հետևանքներ ունենալ»։
«Ընթացիկ իրավիճակը պայմանագրի դենոնսացիային ուղղված միջոցներ և դրանից ՌԴ–ի դուրս գալու ներպետական գործընթացներ է պահանջում, որոնց ավարտին դեպոզիտարիային և մյուս անդամ պետություններին համապատասխան ծանուցում կուղարկվի», – գրված է բացատրական գրության մեջ։
Փաստաթղթում նշված է, որ ՌԴ–ի համար պայմանագրի հետ միասին ինքաբերաբար դադարեցվում է դրա հետ կապված միջազգային պայմանագրերի գործողությունը։