ԵՐԵՎԱՆ, 1 մարտի – Sputnik. Ադրբեջանական կողմը երկու օր անընդմեջ Մարտունու շրջանում կրակել է գյուղատնտեսական աշխատանքներ իրականացնող քաղաքացիների ուղղությամբ, տուժածներ չկան. տեղեկությունը հայտնում է Արցախի ներքին գործերի նախարարության ոստիկանությունը։
«Մարտի 1-ին` ժամը 14:00-ի սահմաններում, Բերդաշեն համայնքի 59-ամյա Ս. Վարդանյանը, «Դավալա» կոչվող տեղամասում, «Բելառուս» մակնիշի տրակտորով գյուղատնտեսական աշխատանքներ իրականացնելիս, հարակից ադրբեջանական մարտական դիրքերից հրաձգային զինատեսակներից կրակահերթ է արձակվել տրակտորի ուղղությամբ։ Գյուղատնտեսական աշխատանքները դադարեցվել են»,–ասվում է հաղորդագրության մեջ։
Միաժամանակ, նշվում է, որ փետրվարի 28-ին` ժամը 16:55-ի սահմաններում, Մարտունու շրջանի Մյուրիշեն գյուղի բնակիչ 53-ամյա Ա. Ավանեսյանը, Բերդաշեն գյուղի վարչական տարածքի «Ասֆալտեն տակ» կոչվող տեղամասում «Ջոնդեր» մակնիշի տրակտորով գյուղատնտեսական աշխատանքներ իրականացնելիս, հակառակորդի մարտական դիրքերից կրակահերթեր են արձակվել տրակտորի ուղղությամբ։ Այս դեպքում նույնպես դադարեցվել են գյուղատնտեսական աշխատանքները:
Նշվում է, որ ոստիկանության Մարտունու շրջանային բաժնում նյութեր են նախապատրաստվել և ներկայացվել ռուսական խաղաղապահ զորակազմին։