ԵՐԵՎԱՆ, 21 հոկտեմբերի – Sputnik. ԵԱՏՄ-ում ձեռնարկված օպերատիվ միջոցառումները թույլ են տվել խուսափել ապրանքների դեֆիցիտից։ Նման կարծիք է հայտնել Ղրղզստանի վարչապետ Ակիլբեկ Ժապարովը Երևանում Եվրասիական միջկառավարական խորհրդի ընդլայնված նիստի ժամանակ:
«Անցած 9 ամիսների ընթացքում մեր կողմից համատեղ օպերատիվ կերպով ձեռնարկվել և համաձայնեցվել են միջոցներ տնտեսական կայունության և պարենային անվտանգության ապահովման, բիզնեսի պահպանման և միությունում հետագա ինտեգրացիոն գործընթացների ապահովման համար»,-ասել է Ժապարովը:
Ընդունվել է ԵԱՏՄ մարմինների 55 որոշում։ Դրանք միջոցներ են, որոնց արդյունքում ժամանակավոր հիմունքներով զրոյացվել են 1310 տեսակ ապրանքների ներմուծման մաքսատուրքերի դրույքաչափերը։
Ժապարովը պարզաբանել է, որ դրանք պարենային և հումքային խմբի ապրանքներ են՝ սննդամթերքի, թեթև արդյունաբերության արտադրանքի, դեղագործական արտադրանքի, մեքենաշինության և այլ ապրանքների արտադրության համար:
Նա նշել է, որ ճգնաժամի պայմաններում բարենպաստ պայմաններ ստեղծելու և բիզնեսին աջակցելու նպատակով մեղմացվել են միության մի շարք տեխնիկական կանոնակարգերի պահանջները։ Առաջին անհրաժեշտության ապրանքների և կրիտիկական ներմուծման ապրանքների պակասուրդից խուսափելու համար ֆիզիկական անձանց համար ապրանքների անմաքս ներմուծման շեմն ավելացել է մինչև 1000 եվրո։
Այս բոլոր միջոցառումների շնորհիվ, նրա խոսքով, հաջողվել է խուսափել ապրանքների դեֆիցիտից։
Հիշեցնենք՝ Երևանում հոկտեմբերի 20–ին և 21–ին անցկացվում է Եվրասիական միջկառավարական խորհրդի նիստը։
Հայաստանի մայրաքաղաք են ժամանել Ռուսաստանի Դաշնության վարչապետ Միխայիլ Միշուստինը, Բելառուսի Հանրապետության վարչապետ Ռոման Գոլովչենկոն, Ղազախստանի Հանրապետության վարչապետ Ալիխան Սմաիլովը, Ղրղզստանի Հանրապետության վարչապետ Ակիլբեկ Ժապարովը և Եվրասիական տնտեսական հանձնաժողովի կոլեգիայի նախագահ Միխայիլ Մյասնիկովիչը:
Հոկտեմբերի 20-ին անցկացվել է Եվրասիական միջկառավարական խորհրդի նիստի նեղ կազմով հանդիպումը։