ԵՐԵՎԱՆ, 13 օգոստոսի – Sputnik. Ռուսաստանի ժողովրդական արտիստ Արմեն Ջիգարխանյանի նախկին կինը` Վիտալինա Ցիմբալյուկ–Ռոմանովսկայան հայտնվել է սկանդալի կենտրոնում։ Այս անգամ պատճառը 2 մլն ռուբլին է, որը նա պարտք է գործարար Յուրի Ռաստեգինին։
Ինչպես գրում է «Սոբեսեդնիկը»` գործով դատավարություն է ընթանում։ Վիտալինան հույս ունի կրճատել գումարը, քանի որ կարծում է, որ գումարի մի մասը պետք է վճարի Ջիգարխանյանը։
Բանն այն է, որ Վիտալինան Ռաստեգինից 2 մլն ռուբլի է վերցրել բնակարանի վերանորոգման համար, որում մտադիր էր ապրել դերասանի հետ։ Գործարարը նրան չի մերժել՝ դերասանի նկատմամբ ունեցած հարգանքից ելնելով։ Մեկ միլիոնը նա Վիտալինային հանձնել էր ստացականով, երկրորդ միլիոնը` տրամադրել էր փոխառության պայմանագրով։
«Ես ունեմ բոլոր փաստաթղթերը, այդ թվում՝ Վիտալինայի անձնագրի պատճենը։ Դրանք ներկայացրել եմ դատարան։ Թեև չէի մտածում, որ գործը սրան կհասնի։ Համոզված էի, որ Ցիմբալյուկ–Ռոմանովսկայան կվերադարձնի ինձ գումարը։ Այն ժամանակ Արմեն Բորիսովիչի հետ նրանց հարաբերությունները նորմալ էին։ Սակայն ամուսնուց բաժանվելուց հետո Վիտալինան նախընտրեց մոռանալ պարտքի մասին», – ասել է Ռաստեգինը։
«Չպիտի նրա կենցաղը փոխեին». Ջիգարխանյանի նախկին կինը մեղադրում է դերասանի հարազատներին
Գործարարը որոշել է դաս տալ Վիտալինային և դիմել է դատարան։ Վիտալինան իր հերթին բողոք է ներկայացրել։ Ռաստեգինի խոսքով՝ Վիտալինան չի հրաժարվում, որ գումար է վերցրել, սակայն միայնակ պարտքը վերադարձնել չի ցանկանում։ Նա կարծում է, որ պարտքի կեսը պետք է տա Ջիգարխանյանը։
Դատական նիստը պարբերաբար հետաձգվում է կորոնավիրուսային վարակի պատճառով։ Սակայն Ռաստեգինը չի կորցնում մինչև տարեվերջ իր գումարը վերադարձնելու հույսը։ Նա նաև հրաժարվում է Վիտալինայից բարոյական փոխհատուցում պահանջել։ Գործարարը համոզված է, որ դատարանն իր օգտին վճիռ կկայացնի։
Միևնույն ժամանակ Ռաստեգինը մշտական կապի մեջ է Ջիգարխանյանի հետ։ Մի քանի տարի առաջ նա հետ գնեց Արբատի բնակարանի մի մասը, որում լեգենդար դերասանն այսօր բնակվում է կնոջ` Տատյանա Վլասովայի հետ։ Բնակարանի մի մասն այսօր ձևակերպված է գործարարի անունով։ Սակայն նրա և Ջիգարխանյանի միջև համաձայնագիր է ստորագրված այն մասին, որ ինքը թույլ է տալիս դերասանին այդ բնակարանում բնակվել ցմահ։ Գործարարը դերասանից որևէ գումար չի վերցնում, Ջիգարխանյանը վճարում է միայն կոմունալ ծախսերը։