ԵՐԵՎԱՆ, 14 հոկտեմբերի — Sputnik. Նախքան Հայաստանին սեփական պատմությունը վերանայելու կոչ անելը Ադրբեջանի նախագահ Իլհամ Ալիևը պետք է հրաժարվի Ռամիլ Սաֆարովին հերոսացնելուց։ Այս մասին այսօր ճեպազրույցի ժամանակ ասաց ՀՀ ԱԳՆ մամուլի քարտուղար Աննա Նաղդալյանը` արձագանքելով Sputnik Արմենիայի թղթակցի` Աշխաբադում տեղի ունեցած միջադեպը մեկնաբանելու հարցին։
Աշխաբադում ԱՊՀ անդամ պետությունների ղեկավարների խորհրդի նիստին Ադրբեջանի նախագահը Հայաստանի ազգային հերոս Գարեգին Նժդեհին անվանել է «նացիստների հանցակից, որին հերոսացրել է նախկին իշխանությունը»։ ՀՀ վարչապետն էլ նույն նիստի ժամանակ արձագանքել է Ալիևի մեղադրանքներին։ Ավելի ուշ Ալիևը ևս մեկ հայտարարություն էր արել և նշել, որ «հայ ժողովուրդը մեծ ներդրում է ունեցել մեր ընդհանուր հաղթանակի մեջ, նախևառաջ, անձամբ պետք է մաքրվի այդ բծից»։
«Հայրենական մեծ պատերազմին մասնակցել է 600 հազար հայ, զոհվել 300 հազարը։ Մենք ԽՍՀՄ 150 հերոս ունենք, 80 գեներալ, 6 մարշալ, ինչը վկայում է Հաղթանակի գործում մեր ժողովրդի ներդրման մասին։ Մենք հպարտանում ենք դրանով», – ասաց Նաղդալյանը։
Միևնույն ժամանակ, նրա խոսքով, հայերը կենաց-մահու պայքար են մղել թուրքերի և կովկասյան թաթարների հետ և հարգում են իրենց հերոսներին այդ պայքարում։
«Ալիևի ասածը լսելիս «Կովկասի գերուհին» հիշեցի». Փաշինյանի պատասխանը Ալիևին. տեսանյութ
«Հայաստանը վստահորեն պայքարում է նեոնացիզմի, այլատյացության, ծայրահեղականության դրսևորումների դեմ։ Մենք մեր փորձով ենք զգացել այդ երևույթների վտանգավոր լինելը, քանի որ այլատյացության զոհ ենք դարձել», – ասաց Նաղդալյանը։
Ինչ վերաբերում է պատմությունը վերանայելու Ադրբեջանի նախագահի կոչին, ապա պարզապես պետք է նշել, որ «պատմությունը Ադրբեջանի նախագահի ամենաուժեղ կողմը չէ»։
«Պետք է արժանին հատուցեմ պատմությունը կերտելու Ադրբեջանի անզուգական փորձին։ Եթե Ադրբեջանի նախագահը նման կոչ է անում, ապա պատասխան կոչով հանդես կգամ. այդ երկրի առաջնորդը պետք է վերանայի իր քաղաքականությունը բարբարոսաբար հային սպանած և դրա համար դատապարտված (Հունգարիայի դատարանի վճռով) Ռամիլ Սաֆարովի ազատ արձակման, հերոսացման և խրախուսման հարցում», – ասաց Նաղդալյանը։
Հիշեցնենք, որ 2004թ-ի փետրվարին հայ սպա Գուրգեն Մարգարյանն անգլերենի դասընթացների էր մասնակցում ՆԱՏՕ-ի «Գործընկերություն հանուն խաղաղություն» ծրագրի շրջանակում: Դասընթացներին մասնակցում էին նաև սպաներ Ադրբեջանից, նրանց թվում՝ Ռամիլ Սաֆարովը:
Նիկոլը ճիշտ էր. ՀՀԿ փոխնախագահը Փաշինյանի պատասխանը տեղին է համարում
Փետրվարի 19-ի գիշերը Սաֆարովը մտել էր Գուրգեն Մարգարյանի սենյակ և կացնահարել քնած հայ սպային: Դեպքից երկու տարի անց մարդասպան Սաֆարովը Բուդապեշտի դատարանում ցմահ ազատազրկման էր դատապարտվել` 30 տարի առանց ներման իրավունքի: 2012թ. օգոստոսի 31-ին Սաֆարովն արտահանձնվեց Ադրբեջանին, որտեղ նրան ներում և զինվորական բարձր կոչում շնորհվեց և միանվագ 8 տարվա աշխատավարձը վճարվեց: