ԵՐԵՎԱՆ, 22 դեկտեմբերի — Sputnik. 2017թ–ի երկրորդ կեսն Արցախում ու շփման գծում ավելի հանգիստ էր, քան առաջինը։ Այսօր Sputnik Արմենիա մամուլի կենտրոնում, լրագրողների հետ հանդիպմանը, վերլուծելով արցախյան համակարտության անցնող տարին, ասաց ՀՀԿ փոխնախագահ, ՀՀ Ազգային Ժողովի արտաքին հարաբերությունների մշտական հանձնաժողովի նախագահ Արմեն Աշոտյանը։
Անցնող տարվա առաջին կեսին, նրա դիտարկմամբ, ավելի շատ էին սահմանային լարվածության, սադրանքների դեպքերն ու մարդկային կորուստները, իսկ երկրորդ կեսին` Ժնևում Հայաստանի ու Ադրբեջանի նախագահների հանդիպումից հետո, լարվածությունը որոշ չափով թուլացավ։
«Լարվածության անկումը ղարաբաղա–ադրբեջանական սահմանին հետևանք չէ ՄԽ համանախագահների առաջարկած և կողմերի ընդունած մոտեցումների, որոնք արտահայտվել են Վիեննայի և Սանկտ–Պետերբուրգի գագաթաժողովներում, հետևանք չէ մոնիթորինգային ֆունկցիաների ընդլայնման, հետաքննության մեխանիզմերի ներդրման, այսինքն` որևէ ինստիտուցիոնալ հիմքի հետևանք չէ։ Լարվածության անկումը կամ թուլացումը կարող ենք կապել բացառապես Ադրբեջանի ռազմաքաղաքական ղեկավարության «բարի կամքի» կամ անձնական որոշման հետ»,– ասաց Աշոտյանը։
Իսկ եթե ավտորիտար որոշման արդյունքում կարող է լինել թուլացում, ապա, ըստ Աշոտյանի, կարող է լինել և սրացում։ Հետևաբար, Արցախում խաղաղության պահպանման և միջադեպերի հետաքննության համար ՀՀԿ փոխնախագահը կարևորում է հենց ինստիտուցիոնալ մեխանիզմների ներդրումը։ «Բարի կամքը կարևոր է, բայց այն պետք է ուղեկցվի բանակցությունների ընթացքում ձեռք բերված պայմանավորվածությունների կատարման քաղաքական որոշումներով»,– ասաց Աշոտյանն` ընդգծելով, որ Արցախի կարգավորման գործընթացն այսօր մեծապես կախված է Ադրբեջանի նախագահի անձից, քանի որ միջազգային կառույցները չեն անցնում Ադրբեջանին պարտադրելու ռուբիկոնը, ինչից էլ օգտվում է այդ երկրի ղեկավարությունը։
![Пресс-конференция Армена Ашотяна Пресс-конференция Армена Ашотяна - Sputnik Արմենիա](https://cdn.am.sputniknews.ru/img/990/92/9909283_0:0:1600:1065_600x0_80_0_0_8ded9698bfdbea4d9328131acc139cff.jpg)
Ինչ վերաբերում է 2018թ–ի կանխատեսումներին, ՀՀԿ փոխնախագահի խոսքով, լավագույն ակնկալիքը կարող է լինել Վիեննայում և Սանկտ Պետերբուրգում ձեռք բերված պայմանավորվածությունների լիարժեք կատարումը, վստահության մթնոլորտի ձևավորումն ու բանակցային միջավայրի բարելավումը։
Բայց, որպես բժշկական կրթություն ստացած անձ, Արմեն Աշոտյանն այս պահին այդ կանխատեսումների իրականացման դրական նախանշանները չի տեսնում։ Դրական նախանշան Աշոտյանը կհամարի այն, երբ Ալիևն իր երկրի ներսում, ներքին լսարանի համար կասի այն, ինչ ասում է ՄԽ համանախագահների հանդիպումների շրջանակներում, և կնախապատրաստի իր հասարակությանը խաղաղության։