ԵՐԵՎԱՆ, 7 հոկտեմբերի — Sputnik. ՀՀ երկրորդ նախագահ Ռոբերտ Քոչարյանն առողջական լուրջ խնդիրներ չունի։ Այսօր դատական նիստից առաջ լրագրողնրին հայտնեց Քոչարյանի որդին` Լևոն Քոչարյանը` նշելով, որ հայրն ընթացիկ հետազոտություններ է անցել, որոնց արդյունքները դեռ հայտնի չեն։
«Ընթացիկ պրոցես է` արյան անալիզներ, այլ հետազոտություններ»,– ասաց նա` չցանկանալով մանրամասներ հայտնել։
Հիշեցնենք` սեպտեմբերի 30–ին Քոչարյանը տեղափոխվել էր «Իզմիրլյան» բժշկական կենտրոն։ Հիվանդանոցի տնօրեն Արմեն Չարչյանը հայտնել էր, որ նա հետազոտություն է անցնում, որից հետո Քոչարյանը տեղափոխվել էր կալանավայր։
Հոկտեմբերի 2-ին ՀՀ երկրորդ նախագահը դարձյալ տեղափոխվել էր «Իզմիրլյան» ԲԿ՝ հետազոտման: Քրեակատարողական վարչության հանրային կապերի բաժնի պետ Նոնա Նավիկյանը Sputnik Արմենիային հայտնել էր, որ նա ընթացիկ բուժզննման է ենթարկվել, որից հետո կրկին վերադարձել է կալանավայր։
Դատարանի որոշմամբ պարզ դարձավ քննիչի ու դատախազների փնթի աշխատանքը. Լևոն Քոչարյան
2018 թվականի հուլիսի 26-ին Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: