Լիլիթ Հարությունյան, Sputnik Արմենիա
Անցած տարին հագեցած էր վերելքներով և անկումներով, հույզերով ու ալեկոծումներով, ոմանց համար էլ տարին նույնիսկ շրջադարձային եղավ: 2017-ի ընթացքում մեր աստղային հայրենակիցների անձնական կյանքում կամ կարիերայում տեղի ունեցող միջադեպերն ու իրադարձությունները ոչ միայն հայ, այլև համաշխարհային հանրության ուշադրության կենտրոնում հայտնվեցին:
Հենրիխ Մխիթարյան
Հայ ֆուտբոլի աստղ Հենրիխ Մխիթարյանի ձեռքբերումներին և անհաջողություններին հուզմունքով էր հետևում ամբողջ աշխարհը:
«Կարմիր սատանաների» ակումբ տեղափոխվելուց հետո հայկական հավաքականի ավագը դժվար կացության մեջ հայտնվեց: «Մանչեսթեր Յունայթեդի» մարզիչը երկար ժամանակ նրան խաղադաշտ դուրս չէր բերում, և հայ կիսապաշտպանի երկրպագուների բազմամիլիոնանոց բանակը սկսեց զայրանալ։ Նրանցից ոմանք նույնիսկ նշեցին, որ մարզիկն իզուր տեղափոխվեց ՄՅՈւ։
Սակայն Մխիթարյանը չհուսահատվեց, կամքի ուժն ու քրտնաջան աշխատանքի արդյունքում նա շուտով դարձավ «ՄՅՈւ»-ի առաջատար ֆուտբոլիստներից մեկը: Ապրիլին հայ մարզիկը ճանաչվեց մանչեսթերականների լավագույն գոլի հեղինակ: Այնուհետև Հենրիխը, աչքի ընկնելով Եվրոպայի լիգայի եզրափակիչ փուլում, մրցաշարում գոլերի քանակով գերազանցեց պորտուգալացի Քրիշտիանու Ռոնալդուի ռեկորդը: Եվրոպայի լիգայի մրցաշարում տարած հաղթանակը կիսապաշտպանը նվիրեց իր ընտանիքին, Մանչեսթեր քաղաքին և հայերին:
Հենրիխի աստեղային ժամը երկար չտևեց. տարեվերջին մարզչի և խաղացողի հարաբերությունները կրկին լարվեցին: Մոուրինյոն նորից սկսեց ֆուտբոլիստին դաշտ չհանել, և Մխիթարյանը մի շարք կարևոր խաղեր բաց թողեց:
Goal.com հեղինակավոր ամսագիրը Հենրիխին ներառեց «խաղաշրջանի առաջին կեսի արդյունքներով վատագույն հավաքականի» կազմում: Շուտով Մոուրինյոն հայտարարեց կիսապաշտպանին վաճառելու մտադրության մասին: Մխիթարյանով միանգամից հետաքրքրվեցին մի քանի թիմեր, այդ թվում նաև` Միլանի «Ինտերը»:
Փորձագետները սկսեցին խոսել այն մասին, որ մարզիչը սխալ է օգտագործում Մխիթարյանին: Գերմանացի ֆուտբոլային փորձագետ Ռաֆայել Հոնիգշտեյնը հայի հավանական վաճառքն անվանեց Մոուրինյոյի հերթական սխալը: Վերջին խաղերում «ՄՅՈւ»-ի անհաջողություններն առիթ տվեցին խոսելու այն մասին, որ ակումբի սեփականատերերը մտածում են թիմի մարզչին փոխելու մասին: Դե ինչ, պատմության շարունակությանը սպասենք 2018 թվականին:
Արմեն Ջիգարխանյան
Ժողովրդական արտիստ Արմեն Ջիգարխանյանի և նրա երիտասարդ կնոջ` Վիտալինա Ցիմբալյուկ-Ռոմանովսկայայի միջև ծագած սկանդալը հայ և ռուս հասարակության համար իսկական «Սանտա Բարբարա» դարձավ (2000 սերիայով հեռուստանովել, որը ցուցադրվում էր 1984-1993 թվականներին — խմբ.)։
Հոկտեմբերին ծավալված պատմությունը լարվածության մեջ է պահում ոչ միայն բուն դրամայի մասնակիցներին, այլև նրանց, ովքեր հետևում են այդ սկանդալին: Յուրաքանչյուր օր, նոր սենսացիաներով ուռճացվող սկանդալը բարձրացնում էր ոչ միայն հեռուստաշոուների, այլև մյուս ԶԼՄ-ների վարկանիշը:
Նախ լուր տարածվեց, որ սիրված արտիստին առևանգել են… Հետո պատմությունը ձնահյուսի վերածվեց… 2017 թվականի հոկտեմբերի 16-ին № 57 Մոսկվայի քաղաքային հիվանդանոցից Անդրեյ Մալախովի «Ուղիղ եթեր» հաղորդման համար տված բացառիկ հարցազրույցում Արմեն Ջիգարխանյանը հայտարարեց, որ Վիտալինան «շատ ցավ է պատճառել», և որ նա չի պատրաստվում ներել կնոջը և չի ուզում տեսնել նրան, քանի որ «նա գող է, ոչ թե մարդ»:
Վիտալինա Ցիմբալյուկ-Ռոմանովսկայան իր հերթին որոշեց ամուսնալուծվել և Ջիգարխանյանի անվան դրամատիկական թատրոնի տնօրենի պաշտոնից հրաժարվելու դիմում ներկայացրեց: Աղմկահարույց ամուսնալուծությունը շոշափեց նաև թատրոնի թեման: 2017 թվականի նոյեմբերի 8-ին «Կոմսոմոլսկայա պրավդա» թերթը հրապարակեց թատրոնում անցկացրած ֆինանսական ստուգումների առաջին արդյունքները, որոնց մասին պարբերականին պատմել էր իրավապահ մարմինների աղբյուրը:
Աղբյուրի համաձայն` «Վիտալինայի պաշտոնավարման ընթացքում արտասահմանյան օֆշորներ է ուղարկվել շուրջ 80 մլն ռուբլի»: Սակայն Ցիմբալյուկ-Ռոմանովսկայան բացառեց նշված գումարի շորթման փաստը: Ամուսիններն ամուսնալուծվեցին նոյեմբերի 27-ին: Բայց անգամ դրանից հետո պատմությունը չավարտվեց. Վիտալինայի և նրա նախկին պաշտոնական ներկայացուցիչ Էլինա Մազուրի գործունեության սենսացիոն մանրամասները շարունակում են մինչև այսօր էլ ցնցել հանրությանը:
Քիմ Քարդաշյան
Ամերիկահայ հայտնի հեռուստաաստղ Քիմ Քարդաշյանը երեք անգամ հայտնվեց սկանդալային պատմության կենտրոնում:
Հոկտեմբերին տեսախցիկներն արձանագրեցին մի երիտասարդ տղամարու, որ փորձել էր ներխուժել Քիմի և նրա ամուսնու` Քանյե Ուեսթի տան տարածք, բայց չէր կարողացել իրագործել ծրագրերը: Փոխարենը նա ջարդել էր տան մոտ կայանած երեք ավտոմեքենաները և դրանցից մեկում այֆոն էր գտել:
Նույն ամսվա վերջին հեռուստաաստղի բաժանորդներին զայրացրեց Քարդաշյանի հելոուինյան կերպարը։ Նա լուսանկար և տեսագրություն էր հրապարակել, որոնցում ներկայացել էր 2001 թվականին Բահամյան կղզիներում ավիավթարի հետևանքով մահացած երգչուհի Ալիայի կերպարով: Բաժանորդներից մեկը գրել էր, որ հեռուստաաստղը չի հարգում մահացածների հիշատակը, եթե հանդես է գալիս նրա կերպարով, ինչ-որ մեկն էլ գրել էր, որ «Ալիան սևամորթ էր, իսկ Քիմը` հայ», եղավ նաև այսպիսի գրառում. «Լեգենդ էր, թե ոչ, բայց Ալիան սևամորթ էր, իսկ դու` ոչ: Վիրավորական է»:
Դեկտեմբերի սկզբին ռեալիթի շոուի աստղը կրկին սկանդալի կենտրոնում հայտնվեց: Instagram-ի Diet Prada էջն ամերիկյան հեռուստաաստղին մեղադրեց Քիմի մանկական զգեստների շարքի համար Ռեյ Կավակուբոյի և Դեմնա Գվասալիայի կերպարները գողանալու մեջ:
Միհրան Հարությունյան
Տհաճ պատմության մեջ հայտնվեց նաև հունահռոմեական ոճի հայ ըմբիշ, օլիմպիական խաղերի արծաթե մեդալակիր Միհրան Հարությունյանը:
Օգոստոսին աբխազ մոդել Մակտինա Բեբիայի հետ ամուսնանալուց մի քանի օր առաջ մոսկվաբնակ մոդելն ըմբիշին մեղադրեց մարմնական վնասվածքներ հասցնելու մեջ։ Նիկոլ Տենը նշեց, որ Հարությունյանի հետ ռոմանտիկ հարաբերություններ է ունեցել, որոնք խզվել են այն ժամանակ, երբ մարզիկը հայտարարել է, որ պատրաստվում է ամուսնանալ ուրիշի հետ։ Ընդ որում` նա խնդրել է ջնջել իրենց միջև եղած անձնական նամակագրությունը։ Տենը հրաժարվել է, ինչից հետո, ըստ մոդելի, Միհրանը ծեծել է նրան։ Աղջիկը հայտարարեց, որ մարզիկից երեխայի է սպասում։ Նա նկարել էր վնասվածքներն ու պատրաստվում էր դատարան դիմել։
Սակայն մարզիկի պատասխանն ամեն ինչ իր տեղը դրեց. «Այն ամենը, ինչ լսում ու կարդում եք, սուտ է և սադրանք: Իրավապահ մարմինները պաշտոնապես հրաժարվել են քրեական գործ հարուցել: Մենք հայտնաբերել ենք նրա ընկերուհու հետ նամակագրությունը, որում նա խնդրել էր ծեծել իրեն ու կապտուկներ հասցնել: Ընկերուհին հրաժարվել է: Եվ նա գրել է, մեջբերում եմ նրա խոսքերը. «Ես ուզում եմ կապ հաստատել և դիմում ներկայացնել»»:
Այսպիսով, մարզիկին հաջողվեց վերջակետ դնել այս պատմությանը և փրկել հեղինակությունը:
Աբրահամ Ռուսո
Երբ քննարկման թեմա դարձավ երգիչ Աբրահամ Ռուսոյի և նրա կնոջ` Մորելա Ֆերդմանի վեճը, հանրությունը շունչը պահած սպասում էր, որ կկրկնվի Արմեն Ջիգարխանյանի և Վիտալինա Ցիմբալյուկ-Ռոմանովսկայայի պատմությունը: Սակայն, ի ուրախություն ինչպես զույգի, այնպես էլ հանրության համար, նման բան տեղի չունեցավ:
Կնոջից բաժանվելու մտադրության մասին Ռուսոն հայտարարեց աշնանը: Մինչ այդ ամուսինները 12 տարի ապրել էին միասին: Սկանդալը ծնվեց այն ժամանակ, երբ Մորելան հայտարարեց, որ ամուսնությունից երկար տարիներ անց ամուսինը լքել է ընտանիքը: Նրա կարծիքով` առավել հավանական է, որ Ռուսոյի կյանքում ուրիշ կին է հայտնվել, եթե որոշել է թողնել երկու դուստրերին:
Մի քանի ամիս շարունակ նա Instagram-ի իր բաժանորդներին պատմում էր իր տանջանքների մասին: Կինը հույս ուներ, որ ամուսինը «կարթնանա և կտեսնի, կգիտակցի` ինչ է անում», հավատում էր, «որ նա պարզապես մոլորվել է»:
Հետո Մորելան մասնակցեց հայտնի թոք-շոուներից մեկին և ասաց, որ ամուսինը խնդիրների մասին խոսելու ուժ չգտավ, փոխարենն իր որոշման մասին հայտարարեց ամբողջ երկրով մեկ: Ամուսինները հրապարակավ մեղադրանքներ և վիրավորանքներ հնչեցրին միմյանց հասցեին:
Սակայն դեկտեմբերի վերջին Ռուսոն միտքը փոխեց և հայտարարեց, որ իր երեխաներն արժանի են լիարժեք ընտանիք ունենալու: Նա նշեց, որ իր ու կնոջ միջև շատ խնդիրներ ու տարաձայնություններ կան, բայց ամեն ինչ կարելի է լուծել:
Կարո Փայլան
Թուրքիայի խորհրդարանի հայազգի պատգամավոր Կարո Փայլանը միշտ առանձնացել է իրերն իրենց անուններով կոչելու քաջությամբ: Այդ պատճառով նա ժամանակ առ ժամանակ վեճեր է ունենում Թուրքիայի խորհրդարանի ներկայացուցիչների հետ:
Դեկտեմբերի վերջին թուրքական մամուլը հաղորդագրություն տարածեց, որի համաձայն` Թուրքիայի խորհրդարանում ընդդիմադիր «Քրդամետ Ժողովրդավարական կուսակցությունը» ներկայացնող հայազգի պատգամավոր Կարո Փայլանի և իշխող «Արդարություն և զարգացում» կուսակցության ներկայացուցիչ Իլկնուր Ինջիսեզի միջև ծեծկռտուք էր տեղի ունեցել:
Միջադեպի պատճառն այն էր, որ Փայլանն ընդհատել էր Ինջիսեզի ելույթը` մեղադրելով նրան անբարոյականության մեջ։ Ինջիսեզը բորբոքվել էր և ասել, որ Կարո Փայլանն իբր վերջին մարդն է, որ կարող է խոսել բարոյականության մասին։ Դրանից հետո պատգամավորներն ազատության էին տվել ձեռքերին։
Միխայիլ Գալուստյան
Ռուս հումորիստ, շոումեն և հայազգի երգիծաբան Միխայիլ Գալուստյանը բավականին հետաքրքիր իրավիճակում էր հայտնվել:
Բանն այն է, որ Չելյաբինսկում Կարեն անունով հայ գործարարը, որը Կոպեյսկ քաղաքում արագ սննդի հաստատության սեփականատեր է, ապօրինի կերպով իր խորովածանոցի վրա տեղադրել էր Միխայիլ Գալուստյանի լուսանկարը: Պատին փակցված գովազդային պաստառի վրա, բացի լուսանկարից, կար նաև հետևյալ գրությունը. «Խորոված, Շաուրմա, ածուխի վրա…»:
ԶԼՄ-ները տարածեցին դերասանի պատկերը, որը գովազդում էր Չելյաբինսկի Կոպեյսկ քաղաքի խորովածանոցը, և խորովածանոցի շուրջ մեծ աղմուկ բարձրացավ:
Իսկ Գալուստյանի դիմումն էլ պատճառ դարձավ, որ Ռուսաստանի հակամենաշնորհային դաշնային ծառայության Չելյաբինսկի վարչությունում քրեական գործ հարուցվի: Ծառայությունը սկսեց ստուգումներ իրականացնել արտիստի դեմքն օգտագործած հաստատությունում:
Գերատեսչությունը հաստատեց, որ ռուս շոումենի պատկերի օգտագործումը գովազդ է: Բացի այդ, դեկտեմբերի 18-ին կայացած Փորձագիտական խորհրդի նիստի մասնակիցներից կեսից ավելին ևս համարեցին, որ Գալուստյանի կերպարը նշված գովազդում օգտագործելն ընկալվում է այնպես, որ նա հավանություն է տալիս արագ սննդի կազմակերպման գործընթացին:
Չարաբաստիկ խորովածանոցի սեփականատերը հանեց դերասանի պատկերով պաստառն ու խոստովանեց` Գալուստյանի լուսանկարն օգտագործել է միայն այն պատճառով, որ շատ է սիրում արտիստին: