ՀՀ–ն խաղաղություն է կառուցում. Արարատ Միրզոյանն այսպես մեկնաբանեց Հաջիևին չպատասխանելը
18:01 27.10.2026 (Թարմացված է: 18:05 27.10.2026)
ՀՀ արտաքին գործերի և միջազգային առևտրի նախարար Արարատ Միրզոյանը. Արխիվային լուսանկար
© Sputnik
Բաժանորդագրվել
Հայաստանի արտաքին քաղաքական գերատեսչության ղեկավարը բացառել է հավանականությունը, որ Հաջիևի պահանջը կարող է դառնալ խաղաղության պայմանագրի ստորագրման ևս մեկ նախապայման:
ԵՐԵՎԱՆ, 27 հոկտեմբերի – Sputnik. ՀՀ արտաքին գործերի և միջազգային առևտրի նախարար Արարատ Միրզոյանի կարծիքով Ադրբեջանի հետ շփումներում պետք է սուր հայտարարություններ անելուց խուսափել։ Այս մասին Միրզոյանն ասաց` անդրադառնալով ԱԺ «Ուժեղ Հայաստան» խմբակցության քարտուղար Տիգրան Աբրահամյանի հարցին։
Նա հետաքրքրվում էր արդյոք խաղաղության գործընթացին չի խոչընդոտում Իլհամ Ալիևի օգնական Հիքմեթ Հաջիևի այն հայտարարությունը, թե հայ ժողովուրդը պետք է ներողություն խնդրի Ադրբեջանից։ Աբրահամյանը նաև շեշտեց, որ ԱԳՄԱՆ–ը մինչև հիմա չի արձագանքել։
Նշենք, որ երեկ Ադրբեջանի նախագահի օգնական Հիքմեթ Հաջիևն ասել էր, որ հայերեը պետք է ներողություն խնդրեմ ադրբեջանցիներից, «որոնք դարձել են փախստականներ»։
«ՀՀ արտաքին գործերի և միջազգային առևտրի նախարարությունը` վարչապետ Նիկոլ Փաշինյանի գլխավորությամբ, խաղաղություն է կառուցում` հասկանալով, որ խոչընդոտներ ու փոսեր կան, որ շատ հեշտ է ընկնել։ Անիվը սիրում է միշտ իր ակոսով գնալ, երբ մեծ ջանքեր են գործադրում այդ ակոսից մի քիչ կողք դնել, միևնույնն է` անիվը կրկին ընկնում է իր սիրելի ակոսը։ Մենք փորձում ենք խուսափել ակոսներից, խաղաղություն ամրապնդել, խնամել ու հոգ տանել խաղաղության մասին։ Միշտ կարելի է արձագանքել, սուր բան ասել, այնտեղից ավելի սուրը կասեն, հետո մենք դրանից ավելի սուր կարձագանքենք, հետո այդպես շարունակ։ Ես լիքը հայրենասեր, պաթոսային բառեր գիտեմ, ուղղակի հարց է` դա կնպաստի՞։ Իհարկե, կխոչընդոտի այդ խոսույթը»,– ասաց Միրզոյանը։
Նախարարը շեշտեց, որ մեկը մեկի նկատմամբ սուր հայտարարություններ անելով վատ տեղ կհասենք։
Նա կարծում է, որ հայկական կողմը պետք է փորձի խուսափել առճակատման տրամաբանությանը վերադառնալուց։
ԱԳՄԱ ղեկավարը նաև հերքեց հավանականությունը, որ Հաջիևի պահանջը կարող է ևս մեկ նախապայման դառնալ խաղաղության պայմանագրի ստորագրման համար:
