Հայաստանն առաջին անգամ Գերազանցության մեդալ է նվաճել «WorldSkills Shanghai 2026»-ում
© Photo : official site of ESCS of RA
Բաժանորդագրվել
Մրցույթի շրջանակում Հայաստանը ներկայացված է եղել նաև պաշտոնական պատվիրակության մակարդակով։
ԵՐԵՎԱՆ, 1 հոկտեմբերի – Sputnik. Հայաստանն առաջին անգամ «WorldSkills Shanghai 2026» միջազգային մրցույթում գերազանցության մեդալ է նվաճել։ Տեղեկությունը հայտնում է ՀՀ կրթության, գիտության, մշակույթի և սպորտի նախարարությունը։
Նշվում է, որ Չինաստանի Շանհայ քաղաքում ավարտվել է «Աշխարհի հմտություններ» (WorldSkills International) 48-րդ միջազգային մրցույթը, որին Հայաստանը մասնակցել է ազգային թիմով` 3 հմտության ուղղությամբ՝ «Խոհարարություն», «Բջջային հավելվածների պատրաստում» և «Նորաձևության տեխնոլոգիա»։
Հայաստանն առաջին անգամ Գերազանցության մեդալ է նվաճել «WorldSkills Shanghai 2026»-ում
© Photo : official site of ESCS of RA
«Մրցույթի շրջանակում Հայաստանի ներկայացուցիչ, Երևանի մասնագիտական կրթության պետական քոլեջի շրջանավարտ Արսեն Արմենակյանը` փորձագետ-մարզիչ Արբի Ղարախանիի գլխավորությամբ, «Խոհարարություն» հմտության շրջանակում արժանացել է «Գերազանցության մեդալի»։ Սա «Աշխարհի հմտություններ» մրցույթներում Հայաստանի ազգային թիմի մասնակցության (մասնակցել է 6 անգամ) պատմության ընթացքում առաջին մեդալային նվաճումն է։ Արսեն Արմենակյանը նաև արժանացել է Հայաստանի ազգային թիմի լավագույն մասնակցի՝ «Best of Nation» մրցանակին»,– ասված է հաղորդագրությունում։
Գերատեսչությունից պնդում են, որ ՀՀ թիմի մյուս մասնակիցները նույնպես բարձր արդյունքներ են գրանցել։
«Բջջային հավելվածների պատրաստում» հմտության մասնակից, Երևանի ինֆորմատիկայի պետական քոլեջի սովորող Արամայիս Հայրապետյանին ընդամենը 14 միավոր է պակասել` «Գերազանցության մեդալ» ստանալուց։ «Նորաձևության տեխնոլոգիա» հմտության մասնակից, Ֆրանս-հայկական ուսումնական կենտրոնի սովորող Լուիզա Զաքարյանին էլ պակասել է 37 միավոր։
Հայաստանն առաջին անգամ Գերազանցության մեդալ է նվաճել «WorldSkills Shanghai 2026»-ում
© Photo : official site of ESCS of RA
Հայաստանի ներկայացուցիչների ընտրությունը կատարվել է ազգային մրցույթի արդյունքներով:
«Աշխարհի հմտություններ» միջազգային կառույցին Հայաստանն անդամակցում է 2012 թվականից՝ ի դեմս ՄԿՈւ զարգացման ազգային կենտրոնի, որն էլ համակարգում է անդամակցության և դրանից բխող գործառույթների իրականացումը:
Մրցույթի շրջանակում Հայաստանը ներկայացված է եղել նաև պաշտոնական պատվիրակության մակարդակով։
