Ռուսաստանի բանակը զանգվածային հարված է հասցրել Ուկրաինայի ռազմարդյունաբերական համալիրին
© Sputnik / Наталья Селиверстова
Բաժանորդագրվել
Հարձակումների ժամանակ Ռուսաստանի զինուժը ցամաքային, օդային և ծովային տեղակայման բարձր ճշգրտության զենք, ինչպես նաև մեծ հեռահարություն ունեցող անօդաչուներ է կիրառել։
ԵՐԵՎԱՆ, 20 օգոստոսի – Sputnik. Ռուսական բանակը զանգվածային հարված է հասցրել Կիևում և Կիևի մարզում գտնվող ռազմարդյունաբերական համալիրի ձեռնարկություններին, տրանսպորտային լոգիստիկ կենտրոնին և պահեստներին, հայտնում է Ռուսաստանի պաշտպանության նախարարությունը։
«Այսօր գիշերը ՌԴ զինված ուժերը ցամաքային, օդային և ծովային տեղակայման բարձր ճշգրտության զենքերով, ինչպես նաև մեծ հեռահարություն ունեցող անօդաչու թռչող սարքերի կիրառմամբ զանգվածային հարված են հասցրել Կիևում և Կիևի մարզում գտնվող ռազմարդյունաբերական համալիրի ձեռնարկություններին, տրանսպորտային լոգիստիկ կենտրոնին և պահեստներին», – ասվում է ՌԴ ՊՆ–ի հաղորդագրության մեջ։
Կիևում խոցվել են`
«Fire Point» ՍՊԸ արդյունաբերական ձեռնարկությունը, որը բաղադրիչներ է արտադրում մեծ և միջին հեռահարության հարվածային անօդաչուների համար, ինչպես նաև իրականացնում «Ֆլամինգո» թևավոր հրթիռներում օգտագործվող արագացուցիչների հավաքում և պահում։
«Ուկրսպեցսիստեմս» ընկերության առևտրապահեստային համալիրը, որտեղ արտադրվում էին մեծ և միջին հեռահարության հարվածային ԱԹՍ–ների բաղադրիչներ, իրականացվում ինքնաթիռատիպ ԱԹՍ–ների խոշորհանգուցային հավաքում և դրանք պահեստավորում։
«Անտոնով» ավիացիոն արդյունաբերության հավաքման գործարանը, որտեղ արտադրվում էին Ան-196 «Լյուտի» մեծ հեռահարության ինքնաթիռատիպ անօդաչուները, ինչպես նաև իրականացվում տարբեր տեսակի անձնակազմով անօդաչուների մշակում և արտադրություն։
Զինամթերքի պահեստը, որտեղ պահվում էին M-900 տերմոբարիկ ավիառումբեր, հակատանկային ականներ և զինամթերք «Բաբա Յագա» տեսակի անօդաչուների համար։
Կիևի մարզում խոցվել են`
«Մարտուսովկա» տրանսպորտային լոգիստիկ կենտրոնը («Զամլեր Գրուպ» լոգիստիկ կենտրոն), որտեղ պահվում և բաշխվում էին կրկնակի նշանակության ապրանքներ, այդ թվում՝ մեծ և միջին հեռահարության անօդաչու թռչող սարքերի, ռոբոտացված համակարգերի և ռադիոէլեկտրոնային պայքարի համակարգերի արտադրության համար։
Բրովարի վառելիքաքսուքային նյութերի պահեստը, որտեղ պահվում էր մինչև 8000 խորանարդ մետր վառելիք` նախատեսված Ուկրաինայի զինված ուժերի համար։
Բացի այդ, օգոստոսի 19-ի երեկոյան «Չեռնոմորսկ» և «Յուժնի» նավահանգիստներում ռազմական գույքով պահեստներ են խոցվել։
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Մարտական գործողություններն ընթանում են մինչ օրս։
Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։
