Ատեստացիա չանցած ուսուցիչը չպետք է աշխատի․ Փաշինյանը կրթական ոլորտում խնդիր է տեսնում
10:14 06.08.2026 (Թարմացված է: 10:32 06.08.2026)
Բաժանորդագրվել
Ըստ Նիկոլ Փաշինյանի՝ կոմպրոմիսների շատ են գնում ատեստացիա անցնող ուսուցիչների հետ։
ԵՐԵՎԱՆ, 6 օգոստոսի – Sputnik. Հանրակրթական ոլորտում ատեստացիա չանցած ուսուցիչները չպետք է դպրոցում աշխատեն։ Այս մասին կառավարության նիստում ասաց ՀՀ վարչապետ Նիկոլ Փաշինյանը։
«Լուրերով նայում էի երեկ, որ անբավարար ստացած դիմորդների թիվն անցած տարվա համեմատ էականորեն ավելի մեծ է։ Սա ահազանգ է։ Ըստ ամենայնի մենք դանդաղում ենք մեր բարեփոխումների ճանապարհին։ Շատ ենք կոմպրոմիսների գնում, անընդհատ ենք կոմպրոմիսների գնում ու արդյունքում տուժում են երեխաները։ Ատեստավորման գործընթաց է, 1, 2, 3, 4․․․ ինչքան կարելի է։ Չի հաղթահարում, ուրեմն պետք է դպրոցում չաշխատի։ Այդ իր աշակերտն է, որ գնում է ու ընդունելության քննությունը գոնե բավարար չի ստանում։ Չեմ էլ ասում գերազանց, գոնե բավարար»,- նշեց Փաշինյանը։
Ընդգծեց՝ պետք է հստակ և վճռական ձևով որոշումներ կայացնել։
Հիշեցնենք, որ արդեն մի քանի տարի է ՀՀ-ում ներդրվել է կամավոր ատեստավորման համակարգը։ ՀՀ կրթության, գիտության սպորտի և մշակույթի նախարար Ժաննա Անդրեասյանը դեռ 2023 թվականի հունիսի 26-ի հայտարարել էր, որ այդ պահի դրությամբ հանրակրթական դպրոցներում 1300-ից ավելի ուսուցիչ կա, որոնք չունեն բարձրագույն կրթություն։
Նա նաև հայտնել էր, թե այդ ժամանակ արդեն իսկ մի քանի տասնյակ ուսուցիչ ստանում էր 400 000 դրամ և ավելի աշխատավարձ։
