Մխիթար Հայրապետյանին փոխարինողին արդեն գտել են. «Ժողովուրդ»
10:36 01.08.2026 (Թարմացված է: 11:01 01.08.2026)
Բաժանորդագրվել
Կառավարության նիստի ժամանակ ՀՀ վարչապետ Նիկոլ Փաշինյանը հայտարարեց, որ ՀՀ բարձր տեխնոլոգիական արդյունաբերության նախարար Մխիթար Հայրապետյանը չի վերանշանակվի
ԵՐԵՎԱՆ, 1 օգոստոսի – Sputnik. ՀՀ բարձր տեխնոլոգիական արդյունաբերության նախարարի պաշտոնում Մխիթար Հայրապետյանին կարող է փոխարինել «Միջազգային ռադիոցանց» ՓԲԸ տնօրենի պաշտոնակատար Դավիթ Թադևոսյանը: Այս մասին գրում է «Ժողովուրդ» օրաթերթը:
«Իշխանական շրջանակներում վերջին օրերին ակտիվ քննարկվում է հենց Դավիթ Թադևոսյանի թեկնածությունը»,- գրում է պարբերականը՝ հղում անելով իր աղբյուրներին։
Նշվում է, որ Դավիթ Թադևոսյանի կենսագրության վերաբերյալ բաց աղբյուրներում տեղեկությունները սահմանափակ են։ Հայտնի է, որ նա ղեկավարում է Գեղարքունիքի մարզի Նորատուս համայնքում գործող «Միջազգային ռադիոցանց» ՓԲԸ-ն՝ որպես տնօրենի պաշտոնակատար։
Նրա անունը հանրային դաշտում առավել տեսանելի է դարձել 2025 թվականի մարտին, երբ այն ժամանակվա բարձր տեխնոլոգիական արդյունաբերության նախարար Մխիթար Հայրապետյանը այցելել էր Նորատուսի ռադիոցանց։ Այցի ընթացքում Թադևոսյանը նախարարին ներկայացրել էր ընկերության տեխնիկական ենթակառուցվածքները, կապի հնարավորությունները և զարգացման ծրագրերը։
Պարբերականը գրում է, որ հենց այդ այցից հետո է Թադևոսյանի անունը սկսել շրջանառվել բարձր տեխնոլոգիական ոլորտի պետական կառավարման շրջանակներում։
Հիշեցնենք, որ հուլիսի 9-ին կայացած կառավարության նիստի ժամանակ ՀՀ վարչապետ Նիկոլ Փաշինյանը հայտարարեց, որ ՀՀ բարձր տեխնոլոգիական արդյունաբերության նախարար Մխիթար Հայրապետյանը չի վերանշանակվի, չնայած, որ հունիսի 25-ին էլ հայտարարել էր, թե կառավարության կազմում փոփոխություններ չի նախատեսում։ ԶԼՄ–ներն էլ գրում են, որ Փաշինյանն ու Հայրապետյանը լուրջ տարաձայնություններ ունեն` IMEI կոդերի միասնական համակարգի ներդրման գործընթացի շուրջ։ Նշվում է, թե Փաշինյանը հայտարարել է, որ նախարարը թերացել է այս համակարգի ներդրման գործընթացի կազմակերպման հարցում։ Խոսվում էր նաև, որ տարեվերջին Հայաստանի ֆուտբոլի ֆեդերացիայի ընտրություններին Հայրապետյանը կարող է առաջադրվել որպես ՀՖՖ նախագահ։ Ներկայիս ղեկավարն արդեն հայտարարել է, որ չի առաջադրվի հաջորդ ընտրությանը։
