ՆԳ նախարարը պարգևատրել է ջրասուզակ Վահե Մելքոնյանին
16:06 25.06.2026 (Թարմացված է: 16:19 25.06.2026)
Բաժանորդագրվել
Տարբեր մեդալներով պարգևատրվել են նաև քույրերի որոնողական աշխատանքներում ներգրավված բոլոր փրկարարական ծառայողները։
ԵՐԵՎԱՆ, 25 հունիսի – Sputnik. Ներքին գործերի նախարար Արփինե Սարգսյանը պարգևներ է հանձնել Փամբակ գետում որոնողական աշխատանքներ իրականացրած ջրասուզակներին, այդ թվում՝ Վահե Մելքոնյանին։ Տեղեկությունը հայտնում է ՆԳ նախարարությունը։
Նշենք, որ այդ ջրասուզակները հունիսի 15–22–ը ակտիվ ներգրավվածություն են ունեցել Փամբակ գետում 7 և 13 տարեկան քույրերի որոնողական աշխատանքներում։
«Ջրասուզակ Վահե Մելքոնյանը պարգևատրվել է «Անբասիր ծառայության համար» մեդալով` ծառայողական պարտականությունները բարեխղճորեն և բարձր պատասխանատվությամբ կատարելու համար։ «Անվեհեր փրկարար» մեդալով էլ պարգևատրվել են Հովակիմ Բաբայանը, Հայկ Քոչարյանը, Արմեն Խաչատրյանը, Պարգև Հովսեփյանը և Մխիթար Մեսրոպյանը։ «Փրկություն, օգնություն» մեդալով պարգևատրվել են Նարեկ Բաբայանը, Արթուր Խաչատրյանը, Խաչատուր Մուրադյանը, Թաթուլ Հովհաննիսյանը, Ռուբեն Հայրապետյանը, Արթուր Խաչատրյանը»,– ասված է հաղորդագրությունում։
Այլ հրամաններով պարգևատրվել են նաև որոնողական աշխատանքներին ներգրավված փրկարարական ծառայողներ։
Սարգսյանը նաև շնորհակալություն է հայտնել փրկարարական ծառայողներին` այդ ամբողջ ընթացքում իրենց կատարած աշխատանքի համար։
ՆԳ նախարարը պարգևատրել է ջրասուզակներին ու փրկարարներին
Հիշեցնենք` հունիսի 15-ին հայտնի դարձավ, որ Փամբակ գետն են ընկել 7 և 13 տարեկան քույրեր։ 7 տարեկան Նարե Մարտիրոսյանի մարմինը հայտնաբերվեց հունիսի 17-ին, նրա քրոջ` 13-ամյա Նարինե Մարտիրոսյանի մարմինը՝ հունիսի 22-ին։ Երկուսին էլ հայտնաբերել և գետից դուրս է բերել ջրասուզակ Վահե Մելքոնյանը։
