ՌԴ դեսպանը Երևանում Պուտինի անունից պարգևներ հանձնեց մի շարք անձանց
© Sputnik / Aram Nersesyan
Բաժանորդագրվել
Հասարակական գործիչներն ու ռուսագետ-մանկավարժները պարգևատրվեցին իրենց ներդրած ավանդի համար
ԵՐԵՎԱՆ, 26 մարտի – Sputnik. Հայ-ռուսական համալսարանի (ՀՌՀ) բանասիրության և միջմշակութային հաղորդակցության ինստիտուտի տնօրեն Նինա Տատկալոն պարգևատրվեց Պուշկինի մեդալով, որը նրան Երևանում ՌԴ դեսպանատանը ՌԴ պետական պարգևների և ՌԴ նախագահի շնորհակալագրերի հանձնման արարողության ժամանակ հանձնեց Հայաստանում Ռուսաստանի դեսպան Սերգեյ Կոպիրկինը:
Սերգեյ Կոպիրկին
© Sputnik / Aram Nersesyan
«Պարգևատրվում են եղբայրական Հայաստանի ակադեմիական հասարակական շրջանակների կարկառուն և արժանավոր ներկայացուցիչներն այն նշանակալի ավանդի համար, որ ներդրել և ներդնում են մեր երկրների միջև մշակութային և հումանիտար համագործակցության զարգացման, ռուսաց լեզվի, ռուսական մշակույթի առաջխաղացման, մեր մշակույթների փոխադարձ հարստացման և ընդհանուր պատմական հիշողության պահպանման գործում», - ասաց Կոպիրկինը:
Նա նշեց, որ Պուշկինի մեդալը շնորհվում է ռուսաց լեզվի և մշակույթի տարածման, մշակույթների մերձեցման և փոխհարստացման գործում ունեցած մեծ ավանդի համար:
Նինա Տատկալո
© Sputnik / Aram Nersesyan
Դեսպանը նշեց, որ Տակտալոն ռուսագիտության ոլորտում երկար տարիներ հաջողությամբ իրականացնում է ծրագրեր, նախագծեր, ակտիվորեն անցկացնում է թեմատիկ դասախոսություններ, ռուսաց լեզվի դասընթացներ, այդ թվում՝ տարբեր ոլորտների մասնագետների համար, մեծապես նպաստում է ռուս և հայ ժողովուրդների միջև բարեկամական մշակութային կապերի ամրապնդմանը:
Երկու երկրների միջև բարեկամության և համագործակցության ամրապնդման գործում ունեցած վաստակի համար Ռուսաստանի նախագահի պատվոգրով պարգևատրվեց «Անմահ գունդ» միջազգային շարժման գլխավոր համակարգող Մհեր Ավետիսյանը:
Սերգեյ Կոպիրկինն ու Մհեր Ավետիսյանը
© Sputnik / Aram Nersesyan
Դեսպանն ընդգծեց, որ պատվոգրով արժևորվել է Ավետիսյանի ներդրումը նախկին ԽՍՀՄ բոլոր երկրների համար ընդհանուր կարևոր և պատասխանատու խնդրի լուծման՝ Հայրենական մեծ պատերազմի մասին հիշողության և ճշմարտության պահպանման գործում:
Դիվանագետը նշեց, որ «Անմահ գնդի» երթը Հայաստանում Մեծ հաղթանակի տարեդարձի տոնակատարության ամենանշանակալի միջոցառումներից մեկն է:
Կոպիրկինն ընդգծեց, որ 2025 թվականին Հայրենական մեծ պատերազմում տարած հաղթանակի 80-ամյակի տոնակատարության շրջանակներում տարբեր տարիքի հազարավոր քաղաքացիներ միասնական շարքով ցուցադրել են իրենց հերոսական նախնիների դիմանկարները՝ երախտագիտություն և հարգանք ցուցաբերելով ընդհանուր հաղթանակի գործում հայ ժողովրդի ներդրման համար պապերի և նախապապերի սխրանքի հիշատակին։
Ռուսաստանի և Հայաստանի մշակութային և հումանիտար կապերի զարգացման գործում ներդրած ավանդի համար ՌԴ նախագահի կողմից շնորհված պետական պարգևների և շնորհակալագրերի հանձնման հանդիսավոր արարողություն
© Sputnik / Aram Nersesyan
«Առանձնահատուկ երախտագիտության է արժանի ձեր աջակցությունը Հայաստանում բնակվող վետերաններին», - նշեց դեսպանը:
Եվս 8 ռուսագետ-մանկավարժներ ՌԴ նախագահի անունից շնորհակալագրեր ստացան ռուսաց լեզվի և մշակույթի առաջխաղացման և ընդհանուր առմամբ ռուս-հայկական մշակութային-մարդասիրական կապերի ամրապնդման գործում ունեցած ներդրման համար.
1.
Խ.Աբովյանի անվան հայկական պետական մանկավարժական համալսարանի ռուսաց լեզվի և նրա դասավանդման մեթոդիկայի ամբիոնի դոցենտ Լիլիա Բալասանյանը,2.
Պլեխանովի անվան Ռուսաստանի տնտեսագիտական համալսարանի Երևանի մասնաճյուղի տնօրեն Թամարա Վարդանյանը,3.
Խ.Աբովյանի անվան Հայկական պետական մանկավարժական համալսարանի ռուսաց լեզվի և նրա դասավանդման մեթոդիկայի ամբիոնի վարիչ Նաիրա Դալյանը,4.
Ռուսագետների հայկական ասոցիացիայի նախագահ Լիաննա Մաթևոսյանը,5.
Գրիբոյեդովի անվան թիվ 11 ավագ դպրոցի ռուսաց լեզվի և գրականության ուսուցչուհի Նատալյա Նալբանդյանը,6.
Վանաձորի Հ. Թումանյանի անվան պետական համալսարանի օտար լեզուների և գրականության ամբիոնի դասախոս Գայանե Հովհաննիսյանը,7.
Ա. Մելիքյանի անվան միջնակարգ դպրոցի ռուսաց լեզվի և գրականության ուսուցչուհի Ջուլիետա Սարուխանյանը,8.
Կ. Մարդանյանի անվան թիվ 3 հիմնական դպրոցի ռուսաց լեզվի ուսուցչուհի Էլի Ծատուրյանը:
